Kanhi Misamis Occidental congressman nakonbikto  tungod sa PDAF scam

DAKBAYAN SA DAVAO (Hunyo 14) — Gikonbikto sa Sandiganbayan ang kanhi magbabalaod gikan sa Misamis Occidental ug duha ka opisyal sa usa ka non-government organization (NGO) sa daghang kasong kriminal tungod sa pagwaldas niadtong 2013 sa Priority Development Assistance Fund (PDAF) o pork barrel funds sa kongresista.

Nakit-an sa Sandiganbayan Second Division si ex-Misamis Occidental Representative Loreto Leo Ocampos ug duha ka opisyal sa Rich Islas de Filipinas Foundation Inc. (RIDFFI) – Josefina Candole ug Jamie Ann Linsangan – guilty sa paglapas sa Anti-Graft and Corrupt Practices Act (RA 3019), malversation of public funds by a public officers, ug falsification.

Gipasakaan usab og kaso si National Commission on Muslim Filipinos (NCMF) Secretary Mehol Sadain ug director for finance Galay Makalinggan. Si Sadain, bisan pa, giabsuwelto tungod sa kakulang sa ebidensya aron ipakita ang iyang pag-apil. Samtang, ang mga kaso batok kang Makalinggan gibasura tungod sa iyang kamatayon niadtong Hulyo 2021.

Gisulat ni Sandiganbayan Second Division Associate Justice Edgardo M. Cadona ang 31 ka pahina nga desisyon nga giproklamar niadtong Hunyo 10. Giuyonan ni Presiding Justice Geraldine Faith A. Econg ug Associate Justice Arthur O. Malabaguio.

Sila si Ocampos, Candole ug Linsangan gisentensiyahan og pagkapriso nga unom ngadto sa napulo ka tuig tungod sa kasong graft nga adunay perpetual disqualification sa paghupot og public office ug civil liability sa kantidad nga P2.1 milyones nga bayronon sa Bureau of Treasury; upat ngadto sa napulo ka tuig alang sa malversation nga adunay multa nga P2.1 milyones; ug duha ngadto sa walo ka tuig alang sa falsification nga adunay multa nga P5,000 matag usa.

Ang mga kaso gipasaka niadtong 2022 sa Office of the Ombudsman.

Ang prosekusyon miingon nga ang PDAF ni Ocampos gi-release sa Department of Budget and Management (DBM) ngadto sa NCMF, nga unya gibalhin ang kwarta ngadto sa RIDFFI niadtong Pebrero 2013.

Matod sa mga piskal nga ang RIDFFI usa ka unqualified ug bogus nga NGO. Gidugang niini nga human makadawat sa P2.1 milyones nga PDAF allocation ni Ocampos, napakyas kini sa pagpatuman sa mga anti-poverty projects nga gisangon niini.

Si Ocampos bisan og malimbungon nga niisyu og Certificate of Completion nga nagpamatuod nga ang RDFFI nakatuman sa ilang mga obligasyon sa memorandum of agreement.

Ang NGO nisumiter og mga dokumento aron ma-validate ang pagpanghatag niini og 350 ka business starter kits alang sa pagpamuhi og lumad nga manok ngadto sa mga konstituwente ni Ocampos.

Hinuon, ang field investigation office sa Ombudsman ug state auditors nikuha ug sworn statements gikan sa gitawag nga mga benepisyaryo nga pulos niingon nga wala gyud silay nadawat nga manok ug ni apil sila sa bisan unsang hands-on training ug entrepreneurship seminars.

“Ang paagi sa pagtuman sa tibuok nga buluhaton dili ikalimod nga nagpakita sa maayong pagkadisenyo nga laraw nga naglambigit sa tulo ka akusado sa pagproyekto sa usa ka lehitimong transaksyon nga magsilbi nga pagtabon aron mapadali o makab-ot ang ilang komon nga kataposang tumong sa pagsuyop sa pundo sa publiko alang sa ilang personal nga kaayohan,” matod sa Sandiganbayan sa ilang desisyon.

Ang anti-graft court nagkanayon usab nga ang mga ebidensiya nagpakita nga ang proyekto nga gipundohan sa PDAF wala gyud matuman ug ang mga dokumento nga gisumite sa akusado nga nagpamatuod sa pagkompleto niini pulos bogus.