DAKBAYAN SA DAVAO (Septiembre 2)—Pormal nang gibaligya sa Quezon City ang mga prutas nga gidala sa Department of Agriculture XI pinaagi sa “Kadiwa on Wheels” isip pag timaan sa pagsugod sa operasyon niini sa Metro Manila.
Ang display gibutang doul sa national office sa Department of Agriculture.
Ang mga pruitas gilangkuban sa mga produkto nga gikan sa Davao ug laing probinsya sa rehiyon, nga gilangkuban sa durian, mangosteen, pomelo, ug uban pang mga lokal nga produkto.
Tumong sa programa nga madala mas duol sa mga konsumidor sa Metro Manila ug sa ubang bahin sa nasud ang mga ani sa mga mag-uuma sa rehiyon, samtang naghatag usab og dugang oportunidad sa merkado para sa ilang mga produkto.
Ang DA central office maoy unang lugar kung diin gibaligya ang mga produkto nga molungtad hangtod Septiyembre 3.
Pagkahuman sa Quezon City, illusad na usab ang proyekto didto sa Kartilya ng Katipunan duol sa Manila City Hall sa Septiyembre 4.
Dalahon na usab ang Kadiwa on Wheels sa Cebu City gikan Septiyembre 10 hangtod 16, Baguio City sa Septiyembre 25 hangtod 28, ug sa World Trade Center sa Pasay City gikan Oktubre 8 hangtod 10.
Matud sa Agribusiness and Marketing Assistance Division sa DA-11, ang programa gitumong sa pagpalig-on sa koneksyon tali sa mga mag-uuma ug merkado, pagpalapad sa maadtuan sa mga konsumidor, ug pagmugna og mas maayong oportunidad para sa mga lokal nga mag-uuma.
Lakip sa mga partisipanteng kooperatiba ug asosasyon sa mga mag-uuma mao ang Davao City Durian Industry Development Council ug ang Durian Industry Association sa Davao City.
Gitinguha sa Kadiwa on Wheels nga makabaligya og mokabat sa 70 metric tons nga mga produkto isip kabahin sa inisyatibo sa pagdala sa mga lokal nga ani ngadto sa mas daghang konsumidor sa nasud.-Gene Lyndon Buenavista
