DAKBAYAN SA OZAMIS, Mindanao—Nahimong dakung pangutana sa katawhan sa Ozamis, ang pagkasunog sa mansion ni Ozamiz City Councilor Ricardo “Aldot” Parojinog kaganihang alas dose sa kaadlawon, Abril 24, 2018 sa barangay Bagakay.
Gipadayag ni Fire senior inspector Wilfredo Dagatan, ang fire marshall sa dakbayan, nga adunay mitawag kanila alas 4:25 na sa buntag nagpahibalo nga gilamoy na sa kalayo ang mansion ni Parojinog, ug mirespunde gilayon sila sa maong sunog.
Dako ang pagtuo sa BFP nga gituyo sa pagsunog ang nasangpit nga mansion tungod kay aduna silay natimahuan nga kerosene ug gasolina sa dihang misulod sila aron sa pagpakgang sa kalayo.
Gidugang ni Dagatan nga ginabanbana nga mokabat sa kapin P5M ang kinatibuk-an nga danyos sa nasangpit nga pagkasunog diin 95 posiento sa maong mansion ang gilamoy sa kalayo.
Natingala usab ang mga otoridad nganong nasunog, kay wala may tawo ang mansion sa dihang nahitabo ang sunog.
Kahinumduman nga human nga napatay si Ozamiz City Mayor Reynaldo Parojinog, Sr., sa drug operation niadtong nakalabay’ng tuig, wala na usab nakit-an ang konsehal ug gikatuohan nga kini nagtago-tago na.
Si Konsehal Parojinog ang padayon nga gipangita sa kapolisan, gumikan sa iyang pagkalambigit sa illegal nga droga. Nasayran nga aduna na kini patong sa ulo nga P10 M. –Neptalie Batolenio/Newsline.Ph
