DAKBAYAN SA DABAW —— Gimandu sa Korte Suprema ang pagsuspenso sa usa ka abogado sa sulod sa tulo (3) ka tuig tungod kay iyang pasagdan ang iyang kleyente human kini nakadawat kuarta nga gibayad sa iyang serbisyo.
Gisuspenso si Attorney Estrella O. Laysa, pinaagi sa usa ka resolusyon nga gipagawas sa Korte Suprema nga gipakanaug pinaagi ni Associate Justice Henry Jean Inting.
Gimanduan usab sa korte si Laysa nga ibalik ang P30,000 nga iyang nadawat gikan sa iyang kanhi kleyente nga nailhang si Patricia Ollada.
Gawas sa paguli sa kwarta, dugang gimando nga mobayad si Laysa og interest sa kwarta nga iyang nadawat ug duna pay dugang P5,000 tungod kay wala nakabayad ang abogado sa iyang ’Bar membership’ ug sa wala pagtuman sa Mandatory Continuing Legal Education (MCLE) nga rekisitos.
Ang desisyon sa Korte Suprema mas luag kaysa rekomendasyon sa Integrated Bar of the Philippines (IBP) nga naghatag kang Laysa og “indefinite suspension”, human sa gihimong disbarment proceedings batok sa abogado, tungod kay nahibaw-an nga mibalhin kini og pinuy-anan nga wala nagpahibalo sa ilang organisasyon,
Miduol si Ollada kang Laysa sa dihang magpasaka kini og kaso batok sa nagrenta sa iyang propidad sa Tagaytay. Apan, igo lang gidawat sa abogado ang kaso ug ang bayad sa iyang serbisyo.
Nahibaw-an nalang ni Ollada nga walay kaso nga napasang-at si Laysa ug wala niini hikaya ang iyang reklamo, hinungdan nga nagkuha og laing abogado ang complainant.
Wala usab gibalik ni Laysa ang kwarta nga gibayad ni Ollada bisan pa man sa iyang pagpadala og mga demand letters.
Ang balaud naklaro nga ang abogado adunay obligasyon nga mohatag sa iyang serbisyo sa iyang kleyente labi na kung nakadawat na kini sa bayad sa iyang serbisyo.-Newsline.ph
