DAKBAYAN SA DABAW (Marso 6) —Gitanggalan sa iyang lisensya ang usa ka babayeng abogado tungod kay naghimo kini ug pekeng desisyon sa Court of Appeals (CA) og iyang gikilkilan ang iyang kleyente.
Sumala ni Brian Hosaka, hepe sa Public Information sa Korte Suprema, gimando na sa Korte ang pagtanggal sa pangalan ni Atty. Marie Frances E. Ramon sa listahan sa mga abogado kon “Roll of Attorneys” niadtong Martes, Marso 5, human napamatud-an nga iyang gi-ilad ang iyang kleyente sa iyang paghimo ug pekeng desisyon og gipagawas nga na-absuelto kini sa kaso nag gisang-at sa Court of Appeals.
Mipasaka ug kaso batok kang Ramon ang mga hurado sa Court of Appeals nga gilangkuban nila ni sila si justices Fernanda Lampas-Peralta and Stephen Cruz og SC justice Ramon Paul Hernando, nga kanhi hurado sa CA.
Iya kunong gi-ingnan ang mga parente ni Fajardo nga iyang mapa-absuelto ang kaso kung mohatag ug dakung kantidad sa mga hurado sa CA.
Matud ni Hosaka, nasuta sa korte nga giilad ni Ramon ang iyang kleyente nga si Tirso Fajardo nga iyang ig-agaw, “Naghimo siya ug peke nga desisyon, nga kuno gi-absuelto na ang kaso nga milambigit kang Fajardo sa druga, ug iyang gigamit ang mga pangalan sa hurado sa Court of Appeals sa iyang pagpangilkil,” saysay ni Hosaka.
Gibutyag sab sa Korte nga ang kaso ni Fajardo nagpadayon ug didto napasa sa laing ‘branch’.
Matud pa sa desisyon sa Korte Suprema, gidaut ni Ramon ang pangalan ug integridad sa korte, ug iyang gilapas ang sinumpaan sa mga abogado ug daghan pang mga balaud kabahin sa Code of Professional Responsibility, ug nagpabadlong kini.
“Ang korte nagbutyag nga giguba ni Atty. Ramon ang imahe sa mga abogado ug kini makapahuyang sa integridad sa hudikatura, maong gisilutan siya nga tanggalon na sa listahan sa mga abogado” matud pa ni Hosaka.-ezc/NewsLine.ph.
