DAKBAYAN SA DABAW — Ang mga bandila sa tanang kampo sa militar tibuok nasud iisa sa tunga nga palo, o half-mast, isip pasidungog sa 11 ka mga sundalo nga namatay sa engkwentro batok sa mga Abu Sayyaf nga terorista sa Biyernes sa hapon, Abril 17, didto sa Sulu.
Matud ni Marine Brig. Gen. Edgard Arevalo, ang tigpamaba sa Armadong Kusug sa Pilipinas (AFP), ang tibuok AFP nagbangutan tungod sa kamatayon sa 11 ka mga bayani nga nihatag sa ilang mga kinabuhi alang sa pagpanalipod sa mga taga-Sulu.
“The entire AFP (Armed Forces of the Philippines) mourns today, 17 April 2020, and our flags in all military camps around the country will be flown at half-mast as 11 Army heroes offered their lives at past 3 p.m. to protect and defend the people of Sulu,” sulti ni Arevalo sa usa ka pamahayag nga gipadala sa mga tigbalita Biyernes sa gabii.
Ang engkwentro nahitabo sa usa ka sitio sa lungsod sa Patikul, kung diin ang mga elemento sa Delta Company sa 21st Infantry Battalion nakigpinusilay sa gibana-banang 40 ka mga miyembro sa Abu Sayyaf nga giingong gipangulohan ni Radullah Sahiron ug Hatib Hadjan Sawadjaan.
Ang pinusilay nilungtad og usa ka oras ug niresulta sa kamatayon sa 11 ka mga sundalo ug pagkaangol sa 14 nilang mga kauban.
Sa wala pa ang maong hitabo, duha ka higayon nang nagka-engkwentro ang militar ug Abu Sayyaf, kung diin daghan ang nangamatay ug nasamdan sa mga terorista.
“This pursuit operation followed two major encounters the previous days where our soldiers inflicted heavy casualties to the enemy (killed and wounded) in both armed engagements. High-powered firearms were also seized by our operating units,” nagkanayon si Arevalo.
Samtang ang tibuok nasud nakiglayog sa coronavirus disease (Covid-19), si Arevalo nag-ingon nga ang mga kasundalohan padayon gihapong nakigbisog batok sa Abu Sayyaf.
Si AFP Chief-of-Staff Gen. Felimon Santos Jr., sa laing bahin, nagpaabot na sa iyang pahasubo sa mga nagbangutang pamilya ug iyang gipaniguro nga mahatagan sila og hinabang. (LBG)
