DAKBAYAN SA DAVAO–– Si Ferdinand Guerrero, usa sa mga akusado sa kasong illegal detention batok sa aktor nga si Vhong Navarro dunay dili maayog rekord, kini sumala ni Bureau of Immigration Commissioners Normal Tansingco.
Sa usa ka sulat pahayag sa Bureau of Immigration social media page, gipaambit ni Tansingco nga sa ilang pagsubay sa mga talaan sa BI ilang nakita nga nga si Guerrero adunay aktibong alert list order, gikan sa warrant of arrest nga giisyu sa Regional Trial Court sa Pasig niadtong Abril 2014.
Matod ni Tansingco bisan asa kon makita si Guerrero, itugyan siya sa kapulisan nga maoy motunol sa iyang arrest warrant.
Gawas sa Alert List, si Guerrero usab ang subject sa aktibong immigration lookout bulletin, nga gi-isyu usab niadtong 2014.
Sa pagkakaron wala pay bag-ong rekord nga mibiahe si Guerrero sumala ni Tansingco.
Si Guerrero maoy usa sa upat nga nakonbikto sa kasong gipasaka ni Navarro. Nahukman si Guerrero sa Taguig Regional Trial Court nga gipagawas niadtong Mayo 2.
Si Guerrero, uban nilang Cedric Lee, Deniece Cornejo, ug Simeon Raz napamatud-ang sad-an sa mga kaso nga gisang-at batok kanila.
Si Guerrero na lang ang nagpabiling gawasnon.
Ang insidente naggikan sa insidente nga nahitabo niadtong 2014 kung diin giakusahan ni Navarro si Guerrero ug ang iyang mga kauban nga nagsakit kaniya ug naghulga nga patyon siya.
