TUDELA, MISAMIS OCCIDENTAL –—Nawad-an og pinuy-anan ang pipila ka pamilya human nga gilampornas sa makusog ng alimpulos ang upat ka mga barangay niining lungsod, kaganinang alas 3 sa hapon, Agosto 5.
Gipadayag ni Mayor Samuel Parojinog nga milungtad og halos 30 minutos ang alimpulos hinungdan nga nangalagpot ang mgab atop sa mga balay. Bisan gani ang poste sa kuryente nangatumba usab.
Sa inisyal nga taho, gipadayag ni Parojinog nga ginabana nga moabot sa 70 ka mga balay ang giguba sa alimpulos sa Barangays Upper Centro, Centro Napu, Civac ug Baserang.
Gumikan sa maong hitabo, wala pa mahibalik ang supply sa kuryente sa maong lungsod.
Gidugang usab sa mayor nga adunay usa ka bata ang gidala sa hospital human nga matumbahan ang ilang balay sa dakong punuan sa kahoy.
Sa pagkutlo niining taho kamulo pa nga giaayo ang mga nangatumba nga poste sa nasangpit nga lungsod.
Ang mga apektadong pamilya ang mibakwit una ug midangop sa ilang mga paryente.
Saysay ni Mayor Parojinog nga padayon pa ang ilang pagkuha sa kinatibuk-ang gidaghanan sa apektadong pamilya sa upat ka mga barangay.-Neptalie Batolenio
