AMAS, NORTH COTABATO (OKTOBRE 22) — Lima sa pamilya ni Agriculture Emmanuel Piñol ang modagan sa umabot nga May 13, 2019 eleksyon didto sa North Cotabato.
Sa lima, upat niini ang igsoon ni Piñol ug sa isa iyang anak.
Sumala sa listahan sa provincial Commission on Elections (Comelec) dinhi, lima ka nagkadaiyang posisyon ang daganan sa mga Piñol.
- Socrates Piñol (Igsoon), kasamtangang Board Member-magpapili pagka Bise Gobernador;
- Dr. Krista Piñol (Anak), modagan pag-ka Board member;
- Efren Piñol (Igsoon)-Congressman sa Segundo Distrito
- Bernardo Piñol (Igsoon)- Kasamtangang Bise Mayor sa Kidapawan City, modagan pagka-mayor og;
- Lito Piñol (igsoon)-Kasamtangang nagsilbe sa iyang katapusang termino isip Mayor sa M’lang, modagan isip Bise Mayor.
Ang mga Piñol managan ubos sa Partido Demokratiko Pilipino-Lakas ng Bayan kon PDP-Laban .
Niadtong Enero 17, 2018, gituboy ni PDP-Laban Chairman Senador Koko Pimentel si Secretary Piñol isip Chairman sa PDP-Laban sa North Cotabato.
Sa iyang pagdawat sa posisyon, namulong si Piñol “Ang akong posisyon sa PDP-Laban naa lang sa probinsya, apan ako kining gi-konsidera nga usa ka importanteng tahas, aron ipa-ila ang mga pagbag-o sa politika sa akong probinsya.”
Isip provincial PDP-Laban leader, nanaad si Piñol “Ako ituboy ang mga kandidato nga andam motrabaho ug taman taman sa natad sa politika, kultura ug makapalig-on sa relasyon sa nagkadaiyang relihiyon ug tribo sa North Cotabato.”
Ang balaud sa Comelec, wala nagbawal kung pila ang puede modagan sa usa ka pamilya.
Gani sa Pilipinas, wala pa mipasar sa Kongnreso ang anti-dynasty bill, ug kini nagpasabot nga maskin kinsa ang puede modagan ug maskin pila ka membro sa pamilya puede usab modagan. Depende lang usab kini sa kuarta ug makinarya sa mga kandidato, ug labi na sa hisgutanang barugan,-Editha Z. Caduaya/NewsLine.ph
