DAKBAYAN SA DABAW —- Sukad Hulyo 10, Biernes, tugotan na sa Department of Interior and Local Government (DILG) ang mga driver sa motor nga mopasakay ug laing pasahero, apan kinahanglan nagpuyo sila sa usa ra ka balay.
Sumala ni DILG Secretary Eduardo Año, ang maka-angkas lang sa motor mao ang mga tawo nga nagpuyo sa usa ka panimalay sama sa mag-asawa, live-in partner or mag-uyab nga nag-ipon.
Apan, usa ka dakong hagit sa otoridad labi na sa mga nagbantay sa control point unsaon pag-ila ug pagpamatuod nga naa sila nagpuyo sa usa ka balay o magti-ayon o live-in partner.
Sa pakighinabi sa ABS-CBN kang Toril Police station Commander Major Jason Baria, iyang gipasabot nga ginahanglan magdala ug “ID” ang sakay sa motor, ug kon pananglitan ‘live-in or mag-uyab ang nagsakay sa usa ka motor, kinahangan nila magdala og barangay certificate nga nagpamatoud nga sila nagpuyo sa usa lang ka bubong.”
Sa pamahayag ni Año, gipasabot niini, nga kinahanglan adunay plastic nga ibutang sa tunga sa duha ka sakay (barrier) ug kinahanglan nga kini lampas sa ulo sa iyang angkas ug labaw sa tanan magsout sila ug face mask ug helmet.
Ang pagbutag ug ‘barrier’ sa motor usa ka pamaagi nga malikayan ang pagtakod sa coronavirus, labi karon nga nagkataas na ang ihap sa mga pasyente nga naay covid-19
Ang molapas sa maong kondisyon kasuhan sa pagsupak sa Executive Order No. 112.
Base sa gilatid sa maong EO kinahanglan nga magsout ug face mask ug mosubay sa kondisyon sa Inter-Agency task Force on Emerging Infectious Disease (IATF-EID) ang katawhan.
Sa kondisyon nga gisaysay ni Año, wala niini gitugutan ang mga habal-habal nga mamasahero.
Usa sa mga sektor nga naapektuhan pag-ayo sa coronavirus-19, ang grupo sa habal-habal nga bisan walay pagtugot sa Land Transportation Office nagpadayon sa ilang pagbiahe ug nanerbisyo sa mga pasahero labi na sa lugar nga nihit kaayo ang pampublikong sakyanan.-Winkle Mae M. Tabuclao/Newsline
