Asawa gimartilyo sa bana, bana miinom og muriatic acid

LUNGSOD SA ANDA, BOHOL — Nagisi ug pulos samad  ang ulo sa usa ka asawa human giingong  gidukdok  og martilyo sa iyang bana  tungod sa ilang lalis.

 Ang bana nagpakamatay pinaagi sa pag-inom ug muriatic acid.

 Sumala pa sa taho,  nagkalalis ang magtiayon sud sa ilang panimalay didto sa barangay Poblacion, lungsod sa Anda, mga alas 12:30 sa sayong kabuntagon niadtong Martes, Enero 23, 2018.

 Ang asawa nailhan nga  si Jocelyn Makinano, 60 anyos. 

 Ang bana giila  nga si Modesto Makinano, 60 anyos, usa ka seaman.

 Basi sa imbistigasyon sa  kapulisan. nagkalalis kuno ang magtiayon nga niresulta sa pagpamun-og. 

Matud sa taho, samtang natulog si Jocelyn, mikuha ug martilyo si Modesto ug gidukdok ang ulo sa iyang asawa,  hinoon wala kini maintimano, apan  nakahiagom og mga samad ug gisi sa ulo niini.

 Pagkahuman, nisulod sa pansayan si Modesto  ug didto miinom og muriatic acid. 

 Sigun ni PO2 Felix Datahan sa Anda Police Station,  naabtan nalang nila nga nagkadugo na ang ulo ni Jocelyn samtang nagbuy-od na sa kasilyas si Modesto.

 Dugang ni Datahan nga naglaslas usab sa pulso si Modesto.

 Daling gihatud ang duha didto sa Gov. Celestino Gallares Memorial Hospital sa siyudad sa Tagbilaran.

Apan, namatay si Modesto bandang alas 5:00 sa hapon niadtong Martes.

Ang  mga silingan nagbutyag nga nagsige na ug away ang magtiayon nga misampot sa madugong hitabo ug kamatayon ni Modesto. 

Padayon pa ang imbestigasyon sa kapulisan aron sa pagtino sa hinungdan sa maong insidente. -Alan Andy Nalzaro Dalagan/Newsline.ph