DAKBAYAN SA OZAMIZ (Hulyo 24) — Usa ka barangay kagawad dinhi sa dakbayan ang gipusil patay sa riding in tandem, samtang nagpaabot ang katawhang Pilipino sa ika-tulong State of the Nation Address (SONA) ni Presidente Rodrigo Duterte, kagahapon sa hapon, Hulyo 23, 2018.
Ang biktima giila sa kapolisan sa Ozamiz nga si barangay kagawad Neil Pintacasi, 38, minyo, ug nagpuyo sa Purok 2, Isla Camote, Bagakay, dinhi sa Ozamiz.
Sa imbestigasyon sa PNP Ozamiz, nasayran nga ang biktima nagsakay sa iyang single motor, gikan pa ang kagawad sa ilang regular nga sesyon sa barangay ug paingon na kining mopauli sa ilang balay. sa dihang nahitabo ang krimen.
Matud pa sa taho sa kapulisan, gi-atangan gyud ang kagawad.
Nakadagan pa og pila ka metros si Pintacasi human matumba ang iyang motor, apan gigukod kini sa suspek ug giposil sa makadaghang higayon.
Nakaangkon og 19 ka igo pinusilan ang kagawad sa iyang dughan, ulo ug ubang parte sa lawas nga maoy hinungdan sa iyang hinanaling kamatayon.
Daling mikagiw ang mga suspetsado.
Nakuha gikan sa nahitabuan sa krimen ang siyam ka basiyo sa kalibre .45 nga pistola,
Sa interview sa Newsline.ph, gipadayag ni Marcelo Romero III, chairman sa nasangpit nga barangay nga dako ang ilang kakurat sa hitabo ilabina nga mao pa lamay paghuman sa ilang session diin malipayon pa silang nag-uban sa biktima.
Nasayran nga mga napulo ka metros lang ang gilay-on gikan sa session hall nga nahitabo ang pagpamusil.
Gipasabot usab sa kapitan nga walay record nga nalambigit sa illegal drugs ang biktima, gani naila kini nga komedyante, daghan og higala ug maaayong tawo.
Wala usab mohatag og pahayag ang pamilya ni Pintacasi ug gihangyo na lang ang ilang pribasiya.
Padayon nga giimbestigahan sa kapolisan ang maong hitabo.
Ang kamatayon ni Pintacasi, ang ika-tulong kaso nga natala sa kapulisan nga milambigit sa “Riding in Tandem” karong bulan sa Hulyo.
Niadtong nakalabayng semana, patay usab sa riding in tandem ang usa ka magtutudlo ug usa ka gidudahang nalambigit sa kasong pag-pangawat.-Neptalie Batolenio/NewsLine.ph
