DAKBAYAN SA DABAW (Abril 20) —Barangay Pulis Patay human gipusil sa iyang silingan niadtong Huebes Santo, didto sa Barangay Talandang, Tugbok District ning dakbayan.
Sumala ni Police Major Ricky Obenza, hepe sa Tugbok Police, gipusil patay ang 43 anyos nga si Amelito Estrella, Barangay Police sa Barangay Talandang Tugbok, alas nuebe sa gabii didto sa Sitio Miasog.
Sumala ni Obenza, naglingkod lang si Estrella kuyog ang iyang kapuyo gawas sa ilang balay , sa dihang kalit giduol sa suspek nga giilang si Jun Palatulon alyas Jun Arab kuyog ang laing duha ka wa mailhing lalaki, dayong gibira ang biktima ug gitalian ang duha ka mga kamot.
Saysay ni Obenza, nagsige ug siagit ang biktima samtang gibitad ni Patalunon, “unsay sala nako namu Jun, unsay sala nako namu?”. Nitubag kuno ang suspek ug “ay nagdaghag pangutana dinha” dungan sa pagpusil sa biktima katulo igo sa ulo ug duha ka sa lawas gamit ang .45 Caliber pistol.
Patay on the spot si Estrella samtang daling misibat ang mga suspek. Sa imbestigasyon sa kapulisan, nasayran sab nga dunay kasuko ang suspek ngadto sa biktima human kining misumbong sa barangay nga nalambigit ang suspek sa pagpangawat sa ilang lugar.-Reeya Nuñez/NewsLine.ph
