DAKBAYAN SA DABAW (September 30) – Gustong pabalikon ug biahe ni Presidente Rodrigo Duterte ang pampasaherong barko nga dunay rotang Davao-Manila.
Niadtong miaging simana, gimanduan sa Presidente si Transportation Secretary Arturo Tugade nga pangitaan kini ug paagi.
“Gusto naku nga ibalik ang rota sa barko nga Davao-Manila, aron naay kapilian ang mga tawo sa ilang sakyan, pangitai ninyo na ug paagi,” kini ang mando ni President kang Tugade.
“Walay kapilian ang katawhan, kanang gikan sa probinsya nga magdala ug mga pasalubong, mapugos ug sakay sa eroplano, kung naay barko, makatipid ang katawhan sa ilang pletehan,” sasay ni Duterte.
Sa eroplano, dies (10) kios lang ang sagad libre nga bagahe, ug mogungag ug P200 kada kilo ang pasahero kung mosobra ang ilang gibitbit.
kapit na magduha ka dekada nga mi-undang ug biahe ang Davao-Manila nga rota sa barko. Gani ang mga taga Dabaw nga mobiahe sa Manila unya gustong magbarko, didto manukad sa General Santos City o kaha sa Cagayan de Oro.
Matud pa ni Tugade, iyang pangitaan ug paagi nga makabalik ug biahe ang barko nga Davao-Manila.
Mirason si Tugade, naundang ang pagbiahe sa mga barko ngahi sa Dabaw tungod kay nag-iyahay ug pabarato ang mga kompanya sa eroplano ug nalugi ang mga tag-iya sa barko.
“Niadto man gud, gipa-ubsan pag-ayo ang pletehan sa eroplano, daghan ug promo, mao wala na kaayo’y manakay ug barko, unya nalugi ang mga kompanya,” matud pa ni Tugade.
Misugyot si Tugade, ang barko kuno nga mobiahe sa Davao-Manila, moagi sa Batangas Port aron, daghan ang pasahero nga maserbisyohan ug malikayan ang pagkalugi.
Aron mobalik og biahe ang pampasaherong barko , nagsugyot si Duterte nga tagaan ug ayuda sa goberno ang mga kompanya sa barko aron dili kini malugi.
Si Potenciano Aron, 60, anyos taga Davao del Sur, nalipay kaayo sa plano sa Presidente, kay matud pa niya sukad wala nay barko sa Dabaw, didto na sya manakayan sa Cagayan.
“Ug madayon na lipay na kaayo ko, kapoy baya magbiahe paingon sa Cagayan kay walo (8) na ka oras ang biahe sa bus paingon didto, maayo unta ug magsugod na,” dugang ni Aron.
Kung madayon ang Davao-Manila nga biahe sa barko, ang mga taga Dabaw dili na moadto sa Cagayan o General Santos aron lang makasakay ug barko, kay didto ra man sa barangay Sasa ang pantalan sa barko.-Harold V. Pontongan/NewsLine.ph
