Ginang gipaak og bitin, patay

Posted on

DAKBAYAN SA TAGBILIRAN, Pilipinas — Patay ang usa ka ginang human gipaak og bitin nga udto-odto didto sa barangay Sagbayan Sur, lungsod sa Sagbayan, Bohol niadtong Martes mga alas 11 sa buntag, Enero 23, 2018.

Biktima nailhan nga mao si Claudia Malubay, 56 anyos, solo parent, mangangahoy ug lumulupyo sa maong dapit.

Nasayran sa taho nga ang biktima mibisita sa balay nga iyang gibiyaan human sa 2013 nga linog, Ug samtang iyang gipangtapok ang iyang mga kinahoy nga isugnod,  kalit lamang ningtumaw ang usa ka bitin nga udto-odto.

Matud pa sa taho, nakalukso ang biktima sa iyang kakurat, apan naabtan gihapon ang iyang too nga tuhod ug gituhak sa maong has.

Ang bana sa pag-umangkon sa biktima nga si Rolando Castañeras, nagbutyag nga nibaktas pa ang iyang iyaan og 30 minutos gikan sa maong dapit paingon sa iyang panimalay.

Matud ni Castañeras nga ilang gipatambalan si Malubay sa usa ka manambalan didto sa barangay San Vicente Norte sa samang lungsod. Gitambagan ang biktima  nga mokaon  og ahos inigbalik na ilang balay.

Apan pag-abot pa sa ilang pinuy-anan giingong dili na mokaon sa ahos si Malubay  kay niungot na ang baba niini.

Ila na usab gidala sa laing tambalan, apan miingon si Castañeras nga wala gihapoy alibyo. Ug niabot nalang sa ikaupat nga manambalan wala gihapon maulian ang nasampit nga biktima.

Nibutyag si Castañeras nga nabugtoan sa gininhawa ang maong biktima mga alas 10 sa gabii nianang adlawa. – Alan Nalzaro Dalagan/Newsline.ph

Be informed
  •  
  •  
  •  
  •  
  •  
  •  
  •  
  •  
  •