DAKBAYAN SA DABAW — USA laborer sa construction naghikog human matud pa gipanginlan nga nangawat ug metal sa iyang gitrabahuan.
Sa report sa Sasa Pulis, adunay nagtawag sa ilang buhatan og nagtaho nga dunay naghikog sa Purok 26, Upper Malagamot, Panacan ning dakbayan niadtong Sabado bandang alas 7:00 sa gabii.
Sa dihang gisuta sa kapulisan, ilang nahibaw-an nga naghikog ang usa ka laborer sa construction nga giilang si Fernando Bautista Jr., 21, residente sa nahisgutang barangay.
Ang amigo sa biktima nga si Elmer Delebios Jr. nagbutyag sa kapulisan nga sa iyang pagsaka sa ikaduhang andana sa ilang balay aron magkuha sa iyang gamit pangkatulog, iyang nakita si Fernando Jr. nga nagbitay sa tunga nga bahin sa ilang balay.
Nagduda ang amahan sa biktima nga ni Fernando Bautista Sr., nga ang iyang anak nagpakamatay human kini gipasanginlang nangawat ug metal sa iyang gitrabahuan ug gipukos kini ug papirma sa usa ka papel nga wala siya kabalo ug unsay nakasulat.
Wala usab gibutyag sa report sa pulis kung kinsa ang nagpamirma sa biktima og lung asa nagtrabaho ang biktima.