DAKBAYAN SA DABAW — Usa ka pulis nga nadismis ug duha pa ka kauban niini ang namatay sa gipahigayon nga buy-bust operation didto sa lungsod sa Polomolok, South Cotabato niadtong Mierkules sa gabii.
Sumala ni Lt. Col. Lino Capellan, tigpamaba sa Police Regional Office-12, namatay ang kanhi pulis nga si Police Officer 1 Joel Labuen ug ang iyang duha ka kauban nga nailhang si , Gary Montero ug usa ka alias “Kokoy,” pulos residente sa Polomolok.
Namatay ang mga suspetsado sa nahitabong engkuentro atol sa buy-bust nga gipangunahan sa drug enforcement unit sa PRO-12, South Cotabato police drug enforcement unit, kuyog ang mga personahe sa Polomolok municipal police station bandang alas 7:15 p.m. atubangan sa minteryo sa DARBC sa Farm Road sa Barangay Cannery Site.
Ang operasyon giusab pinaagi sa pakig alayon sa Philippine Drug Enforcement Agency-Region 12, nga mipunting kang Labuen, nga kanhi nadistino sa Polomolok police station.
Napalitan ug bali’g P500 nga shabu ang usa ka pulis nga gisugo atol buy-bust, sa kamot mismo ni Labuen.
Apan sa dihang natiktikaan sa iyang grupo nga pulis ang nakapalit, dali silang mibunot sa ilang pusil ug didto nagsugod ang pinusilay, nga misangko sa kamatayon ni Labuen ug ni Montero.
Si alias ‘Kokoy’ misulay ug sibat gamit ang usa ma motor, apan, naabtan kini sa naggukod nga kapulisan didto sa Perlan Compound sa Purok Aquino.
Sumala ni Capellan, nagpositibo si Labuen sa gihimong drug test niadtong tuig 2016, ug nagpadayon gihapon sa iyang kalambigtan sa ilegal nga druga.-NewsLine