DAKBAYAN SA DABAW — Ang Department of Social Welfare and Development (DSWD) nag-ingon nga ilang gisagop ang rekomendasyon sa Department of Interior and Local Government (DILG) nga apilon ang pamilya sa mga barangay health worker,
daycare worker, ug mga tanod sa “emergency subsidy” ubos sa Bayanihan Fund: Tulong Laban sa Covid-19 Social Amelioration Program (SAP) sa gobyerno.
Samtang ang mga kawani sa gobyerno walay labot sa SAP, ang mga empleyado sa barangay mahimong benepisyaryo sa maong programa tungod kay sila kabahin sa mga “sub-minimum wage earner.”
Sa ilang press release nga nadawat sa NewsLine kagahapon, Abril 23, ang DSWD nag-ingon nga kadtong mga barangay worker nga nagdawatan og sweldo nga ubos sa minimum wage ug nag-inusarang nangita para sa pamilya makadawat og hinabang ubos sa SAP.
Gimanduan na sa DSWD ang mga tig-implementar sa SAP tibuok nasud nga apilon na ang mga kwalipikadong pamilya sa mga barangay worker sa mga makadawat sa hinabang pinansiyal ubos sa SAP.
Matud pa sa DSWD, ang mga kawani sa barangay dako og natabang sa kagamhanan sa pag-apud-apud sa mga hinabang ngadto sa mga lumolupyo.
Sila angayan nga isipon nga mga frontliner tundod kay nagrisgo usab sila sa ilang mga kinabuhi sa ilang pagpanghatod sa mga hinabang sa barangay.
Ang DSWD padayong nanghatag sa “emergency cash subsidy” nga nalatid ubos sa Republic Act 11469, o “Bayanihan to Heal as One Act.” (LBG)