DAKBAYAN SA DABAW — Gikatakdang makig-istroya si Presidente Rodrigo Duterte sa mga opisyal sa kapulisan sa Jolo kabahin sa pagkamatay sa upat ka Army intelligence personnel sa Jolo, Sulu, kini sumala ni Interior Secretary Eduardo Año.
Sumala ni Año, makig-istorya usab ang Presidente sa mga opisyal ug commanders sa AFP (Armed Forces of the Philippines) ug sa PNP (Philippine National Police) sa Western Mindanao.
Sumala sa taho, niadtong Lunes, Hunyo 29, gipamusil patay sa mga pulis ang usa ka team sa 9th Intelligence Service Unit (ISU) sa Philippine Army, nga gipangunahan ni Major Marvin Indammog, 39, ug iyang mga kauban nga sila si Captain Irwin Managuelod, 33, Sergeant Jaime Velasco, 38 ug si Corporal Abdal Asula, 33.
Ang mga sundalo (intelligence personnel) nga nakasibilyan, niadto sa maong lugar aron maghimo ug ‘signals intelligence or SIGINT operation’ human nakadawat ug taho nga tua didto ang mga suicide bombers nga membro ni Mundi Sawadjan, ang suspetsadong bomb expert nga konektado sa ISIS-linked Abu Sayyaf.
Nagsakay sa usa ka SUV ang mga sundalo, ug sa dihang nilabay sila sa checkpoint sa kapulisan sa Barangay Bus-Bus, Jolo, bandang 2:30 sa hapon nagpaila sila, apan nagduda kuno ang kapulisan og gipaadto sila sa istasyon sa pulis. Apan pag-abot doul sa istasyon sa bombero gipamusil ang mga sundalo nga walay igong rason.
Apan, ang taho sa PNP nabutyag nga misulay kuno ug sibat ang mga sundalo ug didto nagsugod ang pinusilay nga misangpot sa kamatayon sa mga sundalo.
Tungod niini, “Mangita og paagi ang Presidente nga makig-istorya sa mga pulis nga nakapatay sa sundalo,” saysay ni Año, aron aron madungog sa Presidente ang istorya sa duha ka grupo ug aron masubay ang mga panghitabo ug matagaa’g hustisya ang kamatayon sa upat ka sundalo.
Gimanduan ni Duterte si Año nga maglusad ug usa ka komprehensibong imbistigasyon.
Ang mga pulis nga nalambigit sa kamatayon sa mga sundalo, gipangdisarmahan na ug naa na sa ilang pronvincial barracks sa Sulu, samtang nagdagan ang imbistigasyon.
Sumala ni Año personal niyang nakaila ang mga namatay kaniadtong siya pa ang nangulo sa Army Intelligence Security Group ug sa dihang nahimo na siyang assistant chief of staff for intelligence sa army. ug hangtud nga nahimo kining chief-of-staff sa AFP.
“Personal nakung mga kaila, kabalo ko ug unsa sila manarbaho, mag-operate, ilang ginahimo ang ilang tahas sa professional nga pamaagi,” saysay ni Año.
Ang kamatayon sa upat ka intelligence personnel nakapasuko sa kasundaluhan, gani ilang gikondena ang gihimo sa mga pulis.
Tungod niini, gipahimangnuan ni Año si Philippine Army (PA) chief Lt. Gen. Gilbert Gapay nga magbantay sa iyang mga pamulong kabahin sa kaso, kay basin kuno mamahimo kining mitsa sa kagubot.
Niadtong Martes, gihulagway ni Gapay ang kamatayon sa mga sundalo nga usaka ‘murder ug rubout’ ug wala kini motuo nga dunay misencounter kay matud niya wala gayud nakapaboto ang mga sundalong namatay.
Gani gipanawagan ni Gapay nga tanggalon sa puesto si Jolo police chief Lt. Col. Walter Annayo ug Col. Michael Bawayan, Sulu provincial police commander, tungod sa command responsibility.
Sumala sa mga witness, walay nahitabong engkuentro tali sa mga sundalo ug kapulisan, dugang ni Año.
“May mga available eyewitnesses na nagsasabi na wala naman talagang shootout at ito talaga ay isang rubout. Wala namang hawak na baril ‘yung Army operatives at sinasabi ng mga ating eyewitnesses na pinagbabaril na lang talaga itong mga sundalo,” dugang ni Año.
Gimando na ni Police Regional Office-Bangsamoro Autonomous Region regional director Brig. Gen. Manuel Abu ang pagtanggal kang Annayo sa iyang puesto ug ipadala kini sa Sulu Provincial Police Office alang sa imbistigasyon.
Gitanggal ug gidis-armahan na usab sila si S/Sgt. Almudzrin Hadjaruddin, Pat. Alkajal Mandangan, Pat. Rajiv Putalan, Senior M/Sgt. Abdelzhimar Padjiri, M/Sgt. Hanie U Baddiri, S/Sgt. Iskandar Susulan, S/Sgt. Ernisar Sappal, Cpl. Sulki Andaki, ug Pat. Mohammad Nur Pasani –ug anaa na sa kustudiya sa provincial headquarters.
Sumala ni PNP Spokesperson Bernard Banac nagkasinabot na ang PNP ug AFP nga paimbistigahan sa NBI ang panghitabo.-ezc/Newsline