DAKBAYAN SA DABAW (Marso 20) — Gi-istudyuhan na karon sa Catholic Bishops’ Conference of the Philippines (CBCP) nga ilibre ug wala nay bayad ang pagpa blessing sa balay, sakyanan ug pagpamisa sa patay.
Sumala ni Cebu Archbishop Jose Palma, dakung tabang sa mga kabus kung ilibre na ang serbisyo sa kaparian, labi na sa katawhan nga nanginahanglan ug tabang ispiritual.
Apan bisan libre na ang ilang serbisyo, kung mohatag ug pahinungod ang tagtungod o donasyon posible kunong dawaton kini sa mga pari, labi na kung kinasingkasing ang paghatag.
“Kinahanglan mohatag kami ug serbisyo sa katawhan, labi na kon kabahin kini sa atoang pagtuo, sayud sab ang katawhan nga nanginahangan ang kaparian sa ilang suporta,” midungag si Palma.
“Ang pamaagi sa pagsuporta sa kaparian, not through the usual stoll fees kundi mga contributions lamang,” matud sa obispo.
Apan, miingon si Palma nga kung maaprobahan na ang maong sugyot, tiod-tiud pa kining mapatuman, tungod kay kinahanglan pa nga ipahibalo kini sa katawhan.
Niadtong Marso 14, si Bishop Ruperto Santos sa lungsod sa of Balanga, sa probinsya sa Bataan, gapagawas ug usa ka kamanduan nga dili na mokolekta ug bayad ang mga pari sa iyang lugar kung dunay misa sa patay, isip paagi sa pagtabang sa namatyan.
Gimando usab ni Santos sa mga kaparian sa Bataan, nga libre na ang mga misa sa patay, sa mga punerarya ug sa mga memorial chapels.
Una niini, gisaway ni Presidente Rodrigo Duterte ang Romano Katolikong simbahan tungod kay imbis kuno moserbisyo sa kabus, ultimo misa sa patay ila pa kunong kolektahan.
Matud ni Duterte “Kung tinoud nga ang simbahan alang sa kabus, angayan lang nga moserbisyo ang mga layko og kaparian nga libre, ug dili magpabayad.”-jap/NewsLine.ph
