GIDAYEG ni Senador Christopher Lawrence “Bong” Go ang Philippine Sports Commission (PSC) ug ang Games and Amusement Board (GAB) sa ilang padayong pagtan-aw sa kahimtang sa mga atleta tunga-tunga sa krisis nga dala sa coronavirus disease (Covid-19) sa nasud.
“Nagpasalamat ko sa PSC ug sa GAB sa ilang mga inisyatibo alang sa kaayohan sa mga atleta,” sulti ni Bong Go, nga maoy nangulo sa Senate Committee on Sports.
“Nanawagan usab ko sa atong gobyerno nga padayonon ang pagsuporta sa atong mga atleta karong panahon sa kalisdanan,” dugang sa senador.
Si Go midayeg sa PSC sa ilang padayong pagpanghatag og allowance sa mga atleta bisan sa pagkunhod sa ilang pondo human miluwat ang Department of Budget and Management og memorandum circular ngadto sa mga ahensiya sa gobyerno nga i-realign ilang budget para makatabang sa gubat batok Covid-19.
Gikan sa P900 milyones, ang budget sa PSC gipaubsan ngadto sa P200 milyones, nga miresulta sa ilang pagtangtang sa pipila nila ka programa sama sa Philippine National Games, Batang Pinoy, ug ang pag-host sa 10th Asean Paralympics.
Nawad-an usab ang PSC sa 4.7 porsiyento nga monthly remittance gikan sa Philippine Amusement and Gaming Corp. human nga gisuspenso sa gobyerno ang operasyon sa mga casino ug uban pang mga pasugalan sa tibuok nasud.
Bisan pa niini, ang PSC nakakita gihapon og paagi para dili mahunong ang pagpanghatag og sweldo ug allowance sa dul-an 1,000 ka mga national athlete.
Padayon usab ang PSC sa ilang paghatag og kapuy-an ug pagkaon sa mga coach ug atleta nga natanggong sa Metro Manila.
Gidayeg usab ni Bong Go ang PSc sa ilang pag-monitor sa estado sa panglawas sa mga atleta pinaagi sa mga online consultation ug psychological session.
“Importante kaayo nga atong atimanon, dili lang ang pisikal nga kondisyon sa mga atleta, kun dili apil ang ilang mental nga kahimtang,” ingon sa senador. (LBG)
