DAKBAYAN SA DABAW (Octobre 13) — Opisyal nang gitunol ni Davao del Norte Second District Congressman Antonio “Tonyboy” Floirendo sa buhatan sa Commission on Elections sa Davao del Norte ang iyang Certificate Of Candidacy niadtong Huebes.
Si Floirendo magpapili sa iyang ikaduhang termino ubos sa partidong Hugpong Ng Pagbabago (HNP), ang regional party nga gipanguluhan ni Davao City Mayor Sara Duterte-Carpio.
Kuyog nga nagsumiti sa ilang COCs ang unom ka board member sa iyang partido.
Matud pa ni Floirendo, iyang ipadayon ang mga programa ug serbisyo sa iyang katawhan sa segundo distrito nga dugay na nilang giserbisyohan ug aron kuno makatabang sa mga programa ni Presidente Rodrigo Duterte.
Sa iyang unang termino, si Floirendo naputos ug mga isyu tungod sa ilang away ni Davao del Norte Congressman Pantaleon Alvarez.
Gilauman usab nga magpasubli si Gobernador Anthony del Rosario, ang ig-agaw ni Floirendo.
Adunay mga istorya nga atbangan ni Bise Gobernador Allan Dujali si Floirendo sa ikaduhang distrito.
Ang probinsya sa Davao del Norte dugay ng gigunitan sa mga Del Rosario. Harold Pontongan/NewsLine.ph
