DAKBAYAN SA DABAW – Gipahimangnuan ni Mayor Sara Duterte-Carpio ang mga tagdumala sa mga kompanya nga dili kinahanglan ang coronavirus testing sa mga empleyado para makabalik sa ilang trabaho.
Ang mga kompanya sa dakbayan gipahinumdoman usab ni Inday Sara nga siguradohon hinuon nila ang pagpatuman sa physical distancing ug hygiene protocol sulod sa ilang mga trabahoanan.
Si Mayor Sara nag-ingon nga kung gusto gyud sa mga kompanya nga magpa-testing ang mga mobalik sa trabaho, sila ang mosagubang sa gasto ug dili ang mga empleyado.
Ang gasto sa rapid test kits mokabat gikan sa P600 ngadto sa P1,300 matag usa.
“Dili pwede i-require sa mga employers nga magtesting ang ilahang employees para makabalik og trabaho. Especially kung ang employee ang i-require ninyo nga magtesting tapos sila ang magbayad sa ilahang testing,” sulti sa mayor atol sa iyang pakighinabi sa Davao City Disaster Radio sa Huwebes, Mayo 21.
Kung ang mga kompanya gustong mogamit sa rapid test kits para pagprotektar sa ilang mga empleyado, si Duterte nag-ingon nga ang mga test kits didto gyud paliton sa mga accredited supplier ug aprubado sa Food and Drug Administration (FDA).
“Pwede mo mopalit og inyoha because daghan og suppliers karon. Just make sure nga inyohang gamiton nga rapid test, FDA-approved. Didto ta mamili kung mamalit ta kung para sa atoang protection o kagustohan nga mag-test sa atoang employees,” ingon ni Inday Sara.
Rapid Diagnostic Test (RDT) ang kasamtangang ginagamit sa lokal nga kagamhanan alang sa screening sa mga Dabawenyo nga mipauli sa Davao City. (LBG)
