DAKBAYAN SA DABAW–Daghan gihapon ang milapas sa paggamit sa Food and Medicine (FM) Pass ning dakbayan og gani sa usa lang ka adlaw, setenta (70) ka tawo ang nadakpan sa San Pedro Police Station.
Gawas sa wala pagdala sa ilang FM Pass, ubay-ubay usab ang wala nagsunod sa number coding, kini sumala sa Davao City Police Office.
Ang Dakbayan sa Dabaw gipailawom na sa General Community Quarantine (GCQ) apan kinahanglan gihapon magsunod ang katawhan sa pamaagi sa paggamit sa FM ug number coding.
Sumala pa, kaniadtong anaa pa sa Enhanced Community Quarantine (ECQ) ang dakbayan, sagad tag-napulo lang ka tawo kada adlaw ang ilang madakpan, apan niadtong Martes, Hunyo 16, 70 ang ilang nadakpan sa usa lang ka adlaw.
Ang San Pedro Police Station nahimutang sa sentro ning dakbayan, kini doul lang sa Sangguniang Panlungsod, sa City Hall, sa San Pedro Cathedral ug daghan ang patigayon ning maong lugar, maong daghan og tao ang moadto dinhi.
Sa pakighinabisa dxAb sa ABS-ABN, nagpahinumdom si Clapiz, “Ako lang ipahinumdom na ang FM pass para lang na sa pagpalit ug pagkaon, tambal ug uban pang kinahanglanon sa adlaw nga naka skedyul nga adlaw.”
Daghan ang nakamatikod, nga mas ningdagsang ang katawhan nga nanggawas sukad na GCQ ang dakbayan, apan padayong nga nanawagan ang local nga panggamhanan nga padayon niining i-imposar ang FM, physical distancing aron malikayan ang pagtakboy sa Coronavirus-19.-Winkle Mae Tabuclao
