DAKBAYAN SA DABAW – Ang Francisco Bangoy International Airport nangandam na sa ipatuman nga “new normal” sa panahon nga ibalik na unya ang operasyon sa commercial flight.
Gimarkahan na sa Civil Aviation Authority of the Philippines (CAAP) – Davao ug
Airport Police ang mga lugar kung diin mahimong molingkod o mobarug ang mga
pasahero sulod sa terminal sa tugpahanan.
Gibutangan og yellow nga marka ang isig ka tumoy sa mga lingkuranan sa pre-departure area timaan nga mahimo kining malingkoran.
Gawas sa mga duct tape, adunay sa’y mga sticker nga nagpahinumdum sa mga angayang buhaton para makalikay sa sakit.
Para masunod ang “physical distancing,” usa ka metrong distansiya ang gibutang
usab sa linyahanan sa mga check-in counter.
Limitahan usab sa CAAP ang gidaghanon sa mga pasahero ug biyahe sa eroplano. Gikan sa 7-9 ka mga domestic flight kaniadto, karon 2-3 na lang ka biyahe ang mahimo.
Sa laing bahin, gikumpirmar ni Davao Mayor Sara Duterte nga adunay usa ka market
vendor ang nagpositibo sa coronavirus disease (Covid-19).
Matud pa ni Mayor Sara sa interbyu sa Davao City Disaster Radio, ang pasyente
usa ka manindahay sa Bankerohan Public Market.
Ingon sa mayor nga naghimo na sila og disinfection operation sa merkado ug
gipatuman na usab ang lockdown sa maong lugar.
Gipahibalo usab ni Duterte nga sila nangandam na usab sa transisyon gikan sa
enhanced community quarantine ngadto sa general community quarantine karong Mayo 1.(LBG)
