DAVAO CITY — Ang Davao City Police Office (DCPO) nakapasaka na 267 ka mga kaso batok sa mga tawo nga nakasupak sa community quarantine guidelines nga giimplementar sukad niadtong Marso 20.
Si Col. Kirby John Kraft, hepe sa DCPO, nagkanayon nga 347 na ka tawo ang ilang nadakpan nga nisupak sa kwarentina.
Ang mga nangadakpan nisupak sa curfew, liquor ban, social distancing, ug mass gathering, matud pa ni Kraft.
Giawhag sa DCPO chief ang mga Dabawenyo nga mokooperar ug matabang sa kapolisan, ug i-report kanila ang mga tawo nga nagsupak sa kwarentina.
“We would really appreciate reports from citizens about violators of the implementation of the enhanced community quarantine (ECQ). Let us cooperate and help each other in this time of crisis,” sulti ni Kraft Philippine News Agency.
Sa laing bahin, gimanduan ni Mayor Sara Duterte ang kapolisan nga pahingusgan ang pagpangdakop sa mga tawo nga dili motuman sa curfew gikan alas 6:00 sa gabii hangtud alas 6:00 sa buntag.
Sa usa ka interbyu sa radyo niadtong Miyerkules, Abril 8, giawhag usab ni Mayor Sara ang mga motorista nga mokooperar sa mga otoridad nga nagbantay sa mga checkpoint.
“Do not test the law enforcement on the ground implementing our security measures. They are there on the ground because it is mandated by the law,” matud pa sa mayor.
