DAVAO CITY — Sugod karong Lunes, Hunyo 1, makasulod na sa Davao Oriental ang tanang mga sakyanan nga gikan sa laing mga dapit sa Davao Region nga gipaubos sa General Community Quarantine (GCQ).
Ang desisyon sa pagbukas sa mga border, sigun pa ni Gobernador Nelson Dayanghirang, pinasubay sa “Omnibus Guidelines for GCQ” nga giluwatan sa Inter-Agency Task Force for the Management of Emerging Infectious Diseases (IATF-MEID).
Ang gobernador nag-ingon nga ang mga mayor sa napulo ka mga lungsod ug usa ka dakbayan sa probinsiya nagkasinabot na usab sa mga palisiya ug lagda nga ipatuman unya sa pagbukas sa mga border.
“Kinahanglang natong sundon ang mandato ubos sa balaod. Dili nato pugngan ang pagsulod ug gawas sa mga tawo sa atong probinsiya. Apan kinahanglan pud kitang mobutang og mga screening protocol para pagprotektar sa atong mga lumolupyo,” matud pa ni Dayanghirang.
Mapasalamaton ang gobernador sa Davao Regional Task Force on Covid-19, nga gipangulohan ni Davao City Mayor Sara Duterte, sa paghatag kanila og igong panahon nga makahimo sa ilang mga screening protocol ug pagpangita og dugang mga tawo alang sa maong tahas.
Usa sa mga palisiya nga ipatuman atol sa pagbukas sa mga border ang “No Embarkation Form, No Entry Policy,” nga nagkinahanglan sa mga pasahero nga mo-fill up og form sa dili pa siya mosulod sa Davao Oriental.
Ang maong form mahimo rang i-download sa internet ug makuha usab sa mga entry point sa border.
Si Dr. Reden Bersaldo sa Provincial Task Force on Covid-19 nag-ingon nga ang maong palisiya kinahanglan gyud nga ipatuman aron pagsiguro nga walay tawong nagdala og virus nga makasulod sa lalawigan.
“Bisan pa og makasulod ang mga tawo nga dunay Covid-19, sa maong palisiya masayon ra unya ang atong pag-contact trace kanila,” sulti ni Bersaldo.
Buksan ang mga border sa tanang sakyanan gikan Lunes hangtud Biyernes sugod alas 9:00 sa buntag kutob alas 4:00 sa hapon.
Alang sa mga bus pangpasahero, usa ra ka bus kada rota ang makabiyahe matag adlaw ug dili sila mahimong mopasakay ug mopakanaug ug mga pasahero bisan asang lugar.
Matud pa ni Dr. Bersaldo, ang biyahe sa bus terminal-to-terminal lamang aron maminosan ang “exposure” sa mga pasahero sa gawas. (LBG)
