DAKBAYAN SA DABAW —- Gisaway sa usa ka Russian reporter si Presidente Rodrigo Duterte kabahin sa iyang pagsuot ug luag nga ‘necktie’ atol sa ilang panagtagbo ni Prime Minister Dmitry Medvedev niadtong Mierkules, Oktobre 2.
Ang ‘Tweet’ ni Czech journalist nga si Povel Vondro nagkanayon nga si Digong “showed up a bit unkempt” (mipakita nga dili kaayo tarong mamisti) atol sa miting ug gani iyang gi-pangutana kung kabalo ka ba daw kuno ang mga FIlipino mopahaum ug sanina subay sa ‘protocol’ sa usa ka bisita.
Ang tanang opisyal sa nasud, kinahanglan mosunod sa gitawag nga ‘protocol’ o pamatasan nga gilatag subay sa mga kamanduan.
Bisan mga FIlipino nga nakakita sa maong hulagway misaway usab sa Presidente.
Sa mga hulagway ni Digong kuyog lang Medvedev, makita nga luag ang ‘necktie’ sa Presidente.
Apan, matud sa tigpamaba ni Duterte nga si Salvador Panelo, gipaluagan ni Digong ang ‘necktie’ kay mura na kuno siya ug gi-touk ug dili na siya komportable.
Ang pagluag sa ‘necktie’ ni Digong, wala nagpasabot nga walay respeto ang Presidente sa iyang kamiting, saysay ni Panelo.
“Ang pagpaluag sa iyang ‘necktie’ wala nagpasabot nga walay respeto sa Ministro sa Russia or sa mga Roso, si Presidente nag-ilis ug tarong, pero giluagan niya iyang ‘necktie’, para komportable siya,” dugang ni Panelo.
Tanang tawo nga nakadoul kang Digong sa personal nagsulti nga siya humot ug wala man kini manimaho, saysay ni Panelo.
Si Digong naanad nga ‘casual’ lang mananina, dili mahilig ug pormal sa sanina, gani, usahay iyang lukuton ang iyang barong kay gusto niya kanunay siyang komportable sa iyang ginasout, apan pirmi kining limpyo kung moatubang ug tawo.-ezc/NewsLine.ph
