DAKBAYAN SA DABAW, Mindanao— Desidido ang duha ka membro sa Davao City Police Office (DCPO) nga pasakaan ug kaso ang usa ka Driver nga nanginsulto ug nangasaba sa duha ka babayeng pulis human silang gibadlong kay nag inom sa kilid sa kalsada.
Ang driver nailhang usa ka Danny Maratas, nga myembro sa Davao International Transport Cooperative.
Basi sa taho, gibadlong nilang PO1 Rosemarie Rodriquez ug PO1 Shiela Mae Medel nga mga sakop sa Sasa Police Station ang grupo ni Maratas nga nag inom kilid sa kalsada gawas sa 7Eleven landmark Panacan niadtong March 2, 2018 alas dyes sa gabii.
Imbis nga maminaw si Maratas, nasuko na hinoun kini ug gipangitaan ang duha ka mga Policewoman ug documento nga gibawal ang pag inom ug ilimnong makahubog kilid sa kalsada.
Dungan niini, giinsulto ni Maratas ang duha ka mga pulis nga mga hilas na kaayo PO1 palang ang ranggo ug nanghambog pa si Maratas nga iyang ipa transfer ang duha sa Marilog Police Station. Bisan pa sa pag-panginsulto ni Maratas,  nagpabiling kalmado ang duha ka mga Policewoman.
Tungod niini, gipasakaan sa DCPO ug kasong Disobedience to Person in authority si Maratas.
Sa Record sa DCPO nga taas ang kaso sa Physical Injury tungod niining mga mag inom ug ilimnong makahubog hilabi na ng mga anaa kilid lamang sa kalsada, hinungdan nga apil kini sa ilang ginasita. –Rey Nuñez
