OZAMIZ CITY —Gi-aprobahan na sa Kongreso ang mga balaodnon nga magdugang proteksyon sa mga kababayen-an batok sa diskriminasyon.
Giduso ni Misamis Occidental Second District Congressman Henry S. Oaminal ang House Bill 7722 nga nagdugang sa Presidential Decree No. 442 nga “Labor Code of the Philippines,” aron mohatag og dugang ngipon diha sa pagprotekta sa kababayen-an.
Matud ni Oaminal, unod sa mga bag-ong provision sa House Bill 7722 nga dili mamahimong babag sa paghatag og benepisyon ug oportunidad sa panarbaho ang seksualidad ug ang iyang pagkababaye.
“Angayan nga dunay equal opportunity in terms sa panabarho, benepisyo ug promotion ang kababayen-an,” pasabot ni Oaminal.
Napasa sa Kongreso ang maong balaudnon duha ka adlaw una mahuman ang gilunsad sa gobyerno nga 18-day Campaign to End Violence Against Women.
Na-aprobahan usab atol sa maong sesyon niadtong Lunes, Disyembre 1, ang mosunod nga mga Balaud:
- House Bill 135 kon proposed “Caregiver Welfare Act”;
- HB No. 7112 nga nag-deklara sa chlorine isip poisonous substance kung gamiton sa fishing activities;
- HB 7596, nga naghatag og mekanismo aron pagsiguro nga epektibo ang
- Pagpatuman sa Republic Act 10176 kon “Arbor Day Act”;
- HB 7647, nga nag-deklara sa matag Abril 7 isip Barangay Health Worker Day;
- HB 7701, nga nag-deklara sa October 31 matag tuig isip National Savings and Financial Literacy Day;
- HB 7406 nga nagpalig-on ug maghatod og modernisasyon sa Bureau of Fire Protection ug;
- HB 7440 nga magpalambo sa confirmation process alang sa mga imperfect o wala nagkadimao nga titulo sa yuta.
Gi-amendahan sa HB 7440 ang Commonwealth Act No. 141 kon “Public Land Act” ug ang Presidential Decree No. 1529 kon “Property Registration Decree.”
Sumala ni Oaminal, ang mga nahisgutang balaud gihatagan og hugot nga suporta sa liderato ni House Speaker Lord Allan Velasco.-Neptalie A. Batolenio
