Duha ka pulis nga namokbuk ug batan-on, gibalhog sa prisohan

DAKBAYAN SA DABAW, Mindanao-— Gibalhog na karon sa prisohan sulod sa Davao City Police Office ang duha ka membro sa Mobile Patrol Group human kini  nakuhaan ug video nga namukbok ug duha ka  bata-on didto sa barangay 19-B sa Bacaca Enero 21, 2018.

Ang duha ka wala pa nganling pulis miadto sa Bacaca  aron magresponde sa gikatahong riot sa mga batan-on, apan sa ila kining gibukbok sulod mismo sa barangay hall.

Gimandoan gilayon ni ni Mayor Sara Duterte-Carpio si DCPO director Sr. Supt. Alexander Tagum nga imbistigahan ang insidente ug silutan kung mapamatud-an nga milapas sila sa balud.

Matud pa ni Duterte-Carpio, kung nakasala ang mga minor de edad, angayan lang unta nga dalhon sila sa prisinto ug sundoon ang proseso.

“Dili gamitan ug kusog, dakpon lang, gawas kung sila misukol ug ilang gibaliwala ang kapulisan, nga posibleng mosangpiot sa pagkalas sa ilang kinabuhi” Dugang ni Duterte-Carpio.

Sumala pa ni Duterte-Carpio, tagsa ra ug halos wala gani kaso nga pagpang-abuso ang DCPO kabahin sa paglapas sa tawhanong katungod, apan, iyang gimando nga kini imbistigahan.

Sumala pa sa usa ka alias, Allan, gidala sila sa mga pulis didto City Social Services Development Office – Quick Response Team for Children’s Concerns (CSSDO-QRTCC)  sa San Pedro St.  aron papirmahon ug dokumento kabahin sa panghitabo sa ilang barangay kon diin sila nalambigit.

Apan sa  dihang sila gidala ug balik sa barangay hall, didto nahitabo ang pagpamukbok.

“Gibalik mi sa barangay og didto mi gibunalan og gisumbag-sumbag,”  saysay ni Allan.

Si Sr. Insp. Maria Teresita Gaspan, ang tigpamaba sa DCPO nagbutyag nga gibalhog na ang duha sa prisohan sulod sa DCPO.

Nangayo ug pasaylo ang kapulisan tungod sa panghitabo.

“Gikuhaan na sila ug armas,“ midugang si Gaspan.

Gani, gi-aghat ni Gaspan ang mga biktima nga mopasaka ug kaso batok sa duha ka pulis.

Ang duha ka pullis, dunay ranggo nga PO1 ug bag-o pa kini sa serbisyo.-Harold V. Pontongan/Newsline.ph