DAKBAYAN SA KIDAPAWAN (Hulyo 18) —Duha ka miembro sa 19th Infantry Battalion sa Philippine Army ang namatay sa dihang gi-ambush sila sa gituohang miembro sa terroristang New People’s Army didto sa Sitio Bukatol, Kinawayan, Arakan, North Cotabato, kagahapon alas 4:50 sa hapon, Hulyo 17..
Sa imbistigasyon nga gihimo sa Arakan PNP, nahibal-ang nagmotor ang duha ka sundalo nga giilang sila si Private Lendo Borja, 26 anyos taga Barangay Balod, Saint Bernard, Southern Leyte og Private Jame Paul Devara, 24 anyos nga taga Barang Socorro, Catbalogan Samar, paingon sa Kinawayan.
Gikan pa sa ilang kampo ang mga sundalo ug paingon kini sa nahisgutang barangay aron mag-coordinate alang sa gitakdang Peace Rally ugmang adlawa, Apan pag-abot nila sa Barangay Salasang gi-ambush sila sa mga rebeldeng terrorista nga sakop sa Front 53.
Nakakuha ang mga imbestigador ug mga basyo sa M16 sa lugar kung diin gi-ambush ang duha ka sundalo.-CACS/NewsLine.ph
