DAKBAYAN SA DABAW— SUTAON sa rehional nga buhatan sa Department of Education (DepEd) XI , kung kinsa ang angayan manubag sa kamatayon sa Grade-7 nga estudyante, nga nadisgrayas sulod mismo sa iyang tulunghaan sa Holy Cross College of Calinan.
Sumala ni Jenielito Atillo, tigpamaba sa DepEd XI, nagpaabot nalang sila sa report sa division office sa Davao City, kabahin sa gihimong imbistigasyon sa kamatayon ni Anne Bansag.
Matud ni Atillo, mipagawas na og kamanduan si DepEd XI Director Evelyn Fetalvera niadtong Oktobre 28, nga nagmando sa DepEd Davao nga maghimo ug usa ka fact-finding body aron mahibaw-an unsa gayud ang nahitabo.
Matud ni Atillo, kinahanglan matubag sa imbistigasyon ang mga mosunod nga pangutana:
- Unsa ang nahitabo;
- Duna bay nalapas nga polisiya;
- Duna bay kalapasan ang eskuelahan o indibidual;
- Aduna bay ‘safety procedure’ ang eskuelahan nga gisunod sa matag aktibidad, nga ilang gisunod ang mga ‘safey procedures’ sa mga aktibidad;
- Duna bay ‘Emergency Protocol’ nga nalatid ug labaw sa tanan;
- Kinsa ang angay manubag
Naglaum ang DepEd XI, nga isumitir na sa DepEd Davao Division ng ilang taho kabahin sa imbestigasyon karong Nobiembre 15.
Matud ni Atillo, mopagawas ug opisyal nga taho ug rekomendasyon ang DepEd XI, sa panahon nga ilang madawat ug maistudyuhan ang report ug ila kining maaksyonan.
Sumala ni SFO2 Ramil Gillado, imbistigador sa Bureau of Fire Protection XI , angayan nga bantayan pag-ayo ang mga aktibidad sa mga bata, labi ug mogamit kini ug mga materyales nga puede makadakop ug kalayo.
Ang inahan ni Anne, nga si Rutchie Bansag, magtutudlo sa pampublikong tulunghanan, nga nahinabi sa ABS-CBN nagbutyag nga dili niya madawat ang panghitabo.
Gusto niya masuta unsay gihimo sa mga maestra sa iyang anak.
Si Bansag kontestant sa Grade-7 sa Mr & Ms Intrams 2019, ug samtang nangandam kini sa iyang pinturadong ‘Creative Costume’ nga hinimo sa abaca nga gibutangan ug dugang adorno nga nigamit ug kandila isip papilit, misilaab kini, hinungdan sa pagkasunog sa bata niadtong Oktobre 25, sa udto.
PALIHUG USAB BASA : (grade-7-nga-miss-intrams-kontestant-mipanaw-na)
Apan namatay kini niadtong Domingo, Nobiembre 4, sa Southern Philippines Medical Center (SPMC).
Hangtud karon wala pay opisyal nga pahayag ang administrasyon sa HCCC.-jap
