Duterte hulga sa demokrasya ug tawhanong katungod sa Asya

DAKBAYAN SA DABAW, Mindanaw-— Hulga kuno sa demokrasya ug tawhanong katungod sa Southeast Asia si Presidente Rodrigo Duterte kuyog kang Cambodian Prime Minister Hun Sen, kini ang gipagula nga pamulong sa tigpaniktik sa Estados Unidos.

Sa pagrepaso sa mga hulga nga giatubang sa kalibutan, nga gitaho niadtong miaging simana, ang inteligens o tigpaniktik sa Estados Unidos nagbutyag nga si Duterte ug Sen hulga sa Asya ug kini nagpabilin nga talandugon nga isyu.

“Sa Pilipinas, si Presidente Duterte nagpadayon sa iyang kampanya

kontra druga, korapsyon ug kriminalidad,” matud pa sa taho ni Daniel Coats, Director sa National Intelligence sa Estados Unidos.

Gani si Coats midugang, nga gipadugay pa ni Dutuetre ang deklarasyon sa martial law sa Mindanaw hangtud Desyembre 31, 2018.

“Si Duterte nagsugyot pa nga iyang isuspenso ang batakang balaud, aron modeklara ug rebulusyonaryong panggamhanan ug ipakaylap ang martial law sa tibouk Pilipinas,” midugang si Coats.

Sa pagdungog nga nahitabo sa  Kongreso sa Estados Unidos,  niadtong miaging simana, namulong si US Pacific Command commander Harry Harris Jr. nga ang guera kontra druga ni Duterte makapabugnaw sa relasyon tali  Pilipinas ug sa Estados Unidos.

Midugang pa si Harris nga ang kampanya kontra druga ni Duterte nakadaut ug nakaapekto ug relasyon  sa pamilya,sa  komunidad ug sa nasudnoong kalihukan.

Gani, siya  midugangnga ang pamaagi ni Duterte sa pagsulbad sa problema makahagit sa Estados Unidos ug sa ubang nasud.

Sa ilang pagrepaso sa sitwasyon, ilang gitumbok sa report sa Freedom House gigsmit sa panggamhanan sa Pilipinas ang sosyal media aron ipakaylap ang iyang baruganan ug kontrahon ang mga misaway sa pang-goberno.

“Among namatikdan nga ubay ubay na ka mga nasud  ang nagamit sa sosyal media sa iyang  propaganda og  aron inpluwensyahan ang panghunahuan sa local og internasyonal nga komunidad,” matud pa ni Harris.

Ang mga nasud  sa Southeast Asia, matud pa ni Harry, maningkamot gayud aron protektahan ang ilang pagkagawasnon sa mga dikta sa ubang nasyon tungod sa ekonomikanhon ug diplomatic nga mga kasabutan.

Una pa man niini, nagbahad na si Duterte nga dili siya magpaulipon sa mando sa ubang nasud, tungod kay gusto niya gawasnon ang pilipinas ug ang mga Pilipino tungod kay buhi ang demikdrasya sa Pilipinas.

“Di ko gusto nga laing nasud ang magbuot ug magdikta ug unsay angayan nga himoun dinhi sa Pilipinas, kay dili ta nila mga saup, ug dili kita magpa-ulipon.” Matud pa ni Duterte. -Rey Nuñez/Newsline.ph