DAKBAYAN SA OZAMIZ (Mayo 24) — Nagsagul nga kalipay ug kasubo ang gibati ni police chief inspector Jovie Espenido, hepe sa kapulisan dinhi sa Ozamiz sa pagkasikop sa nagtago-tago nga si Ozamiz City Councilor Ricardo Parojinog didto sa Taiwan.
Sa pakighinabe sa membro sa prensa, gipadayag ni Espenido nga daw sagol ang iyang gibati sa maong balita “Nalipay ko nga nasubo,” matud pa ni Espenido.
“Number one nalipay ta kay nadakpan siya nga buhi, pero nasubo ta kay buhi, maayo unta kon….sa tanan man gud nga Parojinog siya ang labing noturyos”, saysay niini.
Gidugang ni Espenido nga ang katawhan sa Misamis Occidental, ingon man sa Ozamiz City mahadlok kon makadungog sa ngalan nga Ardot. Iyang gipasabot nga walay bisan kinsa nga dili mokurog kon si Ardot ang hisgutan.
“Nasulbad ang kaso sa tulo ka mga Narco politician sa Ozamiz nga ginganlan ni Presidente Rodrigo Duterte,” saysay ni Espenido.
Ang ginganlan ni Duterte nga mga narco politicians naglangkob nila ni Ozamiz City Mayor Reynaldo Parojinog, Sr., nga napatay sa drug raid sa pagpanguna ni Espenido niadtong nakalabayng tuig; Vice-mayor Nova Princes Paroijinog nga nasikop niadtong higayuna ug kasamtangan nga nabilanggo dito sa Camp Crame ug Ardot Parojinog nga nadakpan sa Taiwan kagahapon.
Gumikan niini nagpasalamat si Espenido sa tanan nga mga mihatag og impormasyon sa nahimutangan ni Ardot.
Si Ardot maoy usa sa lider sa Kuratong Baleleng sa Ozamiz nga maoy responsable sa mga robbery hold up sa Metro Manila, Cebu ug uban pang dapit.-Neptalie Batolenio/Newsline.ph
