MONKAYO, Davao de Oro – Gidala dayon sa hospital ang biktima nga giila sa mga pulis sa Monkayo Municipal Police Station nga si Justin Buyose Sister, 18 anyos, estudyante, residente sa Purok 3A, barangay Baylo, Monkayo.
Naigo sa ubos nga bahin sa iyang likod ang biktima human gipusil sa fish vendor nga giila sa mga pulis nga si Julieto Cañete Quijada, 50 anyos ug residente sa Purok 2B, Barangay Baylo.
Base sa report sa kapulisan, bandang alas 11:20 sa gabii, Mayo 22 dihang anaa sa waiting shed sa lugar ang biktima kauban ang duha pa ka mga estudyante dihang giduol sila sa suspek ug gipangkasab-an ug dayon hulbot sa gitakin nga wala matinong kalibre sa baril ug gipusil si Sister.
Dali nga misibat ang suspek, apan nadakpan sa mga pulis nga naa sa iyang balay.
Personal nga away kon adunay pagdumot ang usa sa nasubay sa mga pulis nga motibo sa pagpamusil.-Paul Palacio
