DAKBAYAN SA OZAMIZ (Septembre 19) — Patay ang usa ka kanhi membro sa Philippine National Police (PNP) human kini misukol sa gihimong buy bust operation sa kapulisan dinhi sa lungsod niadtong Martes sa gabii, Septembre 18, mga 11:45 sa gabii.
Giila ni Police chief inspector Jovie Espenido, hepe sa Ozamiz PNP, ang suspek nga si Marlon Perolina, 38, minyo ug nagpuyo sa Purok 2A, Barangay Banadero, Ozamiz City.
Nasayran nga si Perolina kanhi pulis sa Cebu City nga adunay ranggo nga PO3 apan na dismiss sa serbisyo tungod sa iyang kalambigitan sa illegal nga druga niadtong 2016.
Base sa pahayag ni Espenido nagpahigayon sila og buy bust operation sa gawas sa balay sa suspek, apan nakamatikod kini nga usa ka pulis ang iyang ka-transakyon, hinungdan nga midagan kini padulong sa sulod sa balay, mikuha og armas ug gipabuthan ang mga polis.
Mibalos sa pagpabuto ang mga pulis. Human sa halos tunga sa oras nga sinukliay sa buto, nakita na lamang nga nahayang na ang suspek ug naligo sa kaugalingong dugo nga wala nay kinabuhi.
Sa tapad sa patayang lawas makita ang us aka KG 9 fire arm uban ang us aka steel magazine nga adunay lima ka mga bala. Nakuha usab duol sa lawas sa biktima ang siyam ka basiyo sa caliber 9mm nga pistol.
Nakuha sa bulsa sa suspek ang siyam ka sachet sa shabu ug duha ka tag 100 peso nga papel de bangko.
Nakaangkon ug daghang samad pinusilan ang suspek sa nagkadaiyang bahin sa iyang lawas nga maoy hinungdan sa iyang kamatayon.
Nahitabo ang operasyon sa PNP mga 11:45 sa gabii, September 18, 2018.
Wala pay gipagawas nga pahayag ang nga kabanay sa namatay nga suspek.-Neptalie Batolenio/NewsLine.ph
