DAKBAYAN SA DABAW (Mayo 21) — Gidawat na ni Presidente Rodrigo Duterte ang pagluwat sa aktor nga si Cesar Montano isip hepe sa Tourism Promotions Board (TPB) Lunes sa hapon, Mayor 21.
Usa ka tinubdan sa Palasyo nagbutyag nga wala nagpanuko ug dawat ang Presidente sa resignation ni Montano.
Una niini, gikompirma ni Tourism Secretary Bernadette Fatima Romulo-Puyat, nga misumitir na si Montano sa iyang “Resignation letter”.
Nahimong kontrobersyal si Montano, human migawas nga ang iyang buhatan mibayad ug P80-milyones alang sa usa ka programa sa Department of Tourism,nga gitawag ug Buhay Carenderia .
Ang “Buhay Carenderia” usa ka programa sa DOT nga nagtumong nga iduso ang local nga mga pagkaon nga ikapasigarbo sa Pilipinas, apan nahibaw-an nga ang amiga ni kanhi Tourism Secertary Wanda Teo, nga tag-iya sa Mary Lindbert International Incorporated ang gitagaan sa maong proyekto.
Sumala pa ni Montano, maskin kuno siya ang nagpirma sa tseke, wala siya masayod nganong gidali-dali ang pag proseso sa bayad nga mokabat sa P80-milyones.
Matud pa ni Puyat “Ako gikonsidera nga sirado ang maong hisgutanan, ug ako ng gitugyan sa Commission on Audit ang pag imbistiga sa isyu.”-Harold V. Pontongan/Newsline.ph
