DAKBAYAN SA DABAW —Mipanaw na niadtong Domingo, Nobiembre 3, ang Grade-7 nga estudyanteng nasunog sa dihang aksidenteng nidilaab ang iyang abacca-inspired nga costume samtang nangandam sa Mr & Ms Intrams sa Holy Cross College of Calinan.
Anaa karon sa Freedom Life nga punerarya sa Calinan ang patayng lawas ni Bansag.
Si Bansag mo-representar unta sa Grade -7 niadtong Oktobre 25, apan samtang nangandam kini sa iyang ‘Creative Costume’ nahitabo ang aksidente, sulod mismo sa Campus sa Holy Cross.
Nadala pa siya sa Southern Philippines Medical Center (SPMC) si Bansag, apan human sa siyam (9) ka adlaw mipanaw na kini.
Sumala sa taho sa Calinan pulis, nagtindog si Bansag samtang sout ang iyang costume nga pinturado, apan gidugangan pa kini ug mga adorno, gamit ang glue gun ug glue stick.
Sa dihang naguba na ang glue-gun nga butanganan sa glue-stick, nagdesisyoon ang iyang mga kaubang maestra nga kandila ang gamiton aron ipapilit ang uban pang dekorasyon, ug misindi sila ug tulo ka kandila.
Apan, kalit nga gidakop sa kalayo ang costume sa bata ug midilaab, tungod kay pinturado ang iyang sout.
Sa unang pahayag sa inahan si Bansag nga si Hochie Bansag, mopasaka sila ug kaso batok a mga hingtungdan.
Hangtud karong mga orasa, wala pa mipagawas og opisyal nga pahayag ang Holy Cross of Calinan kabahin sa maong insidente.
Si Bansag bugtong anak nga babae sa iyang pamilya.-Reeya Nuñez/newsline.ph
