DAVAO CITY – Giransak sa wala pa mailhing mga suspetsado ang cash safety box sa usa ka grocery store nga dunay gibana-banaang sulod nga 400,000 pesos, gilimas ang sulod sa BDO ATM ug Pay and Go loading machine nga dili pa matino ang natangag nga cash.
Subay sa report sa Talomo Police Station 3, miagi sa manhole/drainage sa kalsada ang mga responsable ug gipuntirya ang grocery store nga nahimutang sa Puan, Davao City pinaagi sa paglungag sa sementadong salog sa pharmacy area nga maoy entrance ug dayon gipanglimas ang ubang butang.
Nadiskubrehan nga giransak ang choicemart grocery dihang giablihan na kini sa empleyado ug nakita nila kauban ang security guard nga nagkatag na ang ubang tinda sa salog hinungdan nga nanawag sila og 911.
Nakarekober ang mga otoridad og duha ka empty bottle sa energy drink ug laing 3 ka empty plastic bottle sa tea ug industrial materials nga gigamit sa mga responsable.
Sumala ni PMaj Rose Aguilar ang Station Commander sa Police Station 3, nagpahigayon na og lawom nga imbestigasyon ang mga pulis sa lugar ug ginasusi ang mga cctv nga posibleng makatabang sa imbestigasyon ug nanawagan sab kini sa mga tawo sa lugar nga adunay nahibaloan hilabi na sa mga bag-ong salta nga tawo o di kaha nangarkila og balay nga sagad mga lalaki nga moreport dayon sa mga pulis.
