DAKBAYAN SA TAGUM— TIKLO sa otoridad ang usa ka habal-habal driver nga namaligya ug ilegal nga druga sa usa ka pulis, atol sa buy-bust operation didto sa Purok Mahogany, Barangay Sawata, San Isidro, Davao del Norte, niadtong Martes Marso 10 alas 4:30 sa hapon.
Sumala ni Police Captain Marvin Estaciones, hepe sa San Isidro pulis, nadakpan si Inocencio Ador Natores alias “kirat”, 26 anyos, ulitawo, atol sa buy bust ug wala na kini makalikay.
Napalitan ang suspetsado ug usa ka gamayng selopin nga dunay sulod nga gituohang ‘shabu’ , lighter ug kuarta nga mokabat sa P1,200, nga nahimong ebidensya batok kaniya.
Ang pagrekesa sa lawas sa suspetsado gitambungan sa representate sa Department of Justice.
Gihikay na karon sa kapulisan ang pagpasaka ug kaso batok sa suspetsado.
Una niini, gimando ni Mayor Arnel Sitoy sa kapulisan nga pahugtan ang kampanya batok sa ilegal nga druga aron malikay ang katawhan labi na ang mga kabatan-onan sa kadaut nga dulot sa paggamit ug ilegal nga druga-jap/NewsLIne
