DAKBAYAN SA DABAW –— Hangyoon ni Presidential Spokesperson Harry Roque ang Department of Labor and Employment(DOLE) nga magbutang ug ‘one-stop shop’ alang sa mga empleyado nga mawad-an og trabaho tungod sa pagsira sa ABS-CBN.
Sa usa ka ‘televised interview’ niadtong Huebes, giluatan ni Roque nga iyang hangyoon si (DOLE) Secretary Silvestre Bello III nga magbutang ug usa ka lugar kong diin didto moadto ang mga mawad-an ug trabaho nga empleyado sa ABS-CBN.
Ang pagbasura sa Congress Committee on Franchise sa renewal sa prakesa sa ABS-CBN, makapasakit dili lang sa tag-iya sa maong companya, daku kini ug epekto sa 11,000 ka empleyado ug labing maapektuhan ang ilang mga pamilya.
Sa one-stop shop nga pagahimoon, didto kuno modoul ang mga taga ABS-CBN nga nawad-an og trabaho, ug sila tabangan ka makakuha ug trabaho.
Sama sa mga trabahante nga nawad-an og trabaho tungod sa pandemya sa coronavirus-19, kualipikado ang taga ABS-CBN nga tagaan og suporta sa gobierno.
Sumala ni Roque, suportahan ni Bello ang iyang hangyo, ug ang maong lakang makahatag og higayon nga makakita og trabaho ang naapektuhan nga empleyado labi sa mga nagpuyo sa kaoluhan.
Sa sulat pahayag nga gipagawas sa ABS-CBN niadtong miaging adlaw, gibutyag niini nga sugod karong Agosto 31, hinayhinay na nila nga pananggalon ang ilang 11,000 ka mga trabahante.
Ang pagsira sa ABS-CBN nakapasubo dili lang sa mga empleyado, apan naapektuhan ug nasubo usab ang ilang tagasunod.
Sa sulod sa pila ka dekada gihimo na nilang kabahin sa ilang kinabuhi ang ABS-CBN kong diin sila malingaw sa mga teleserye, drama ug mga pasig-ugda niini nga makalipay kanila ug kong diin usab sila makakuha ug inpormasyon ug edukasyon.-Newsline
