DAKBAYAN SA DABAW– GISIKOP sa operatiba sa Philippine National Police (PNP) Integrity Monitoring Enforcement Group (IMEG) ang hepe sa pulis didto sa lungsod sa Agusan del Norte niadtong Martes, Marso 24 sa alegasyong pag-pangilkil sa mga negosyante.
Sa taho nga gipagawas sa Philippine News Agency, gibutyag ni Police Regional Office-13 director, Brig. Gen. Joselito Esquivel Jr. nga nasikop si Police Captain Junil Gultiano sa gihimong entrapment operation, kini human nakadawat ang PNP ug ubay ubay nga reklamo sa alesgasyong pag pangolekta niini ug kuarta gikan sa mga negosyante.
Sumala ni Esquivel, daghan na sila ug nadawat nga reklamo nga kuno nagdawatan si Gultiano ug P500 kada semana gikan sa mga membro sa Buenavista Furniture Association (BFA) ug dugang P5 kada polgada sa kahoy nga mahalin, busa gilusad sa IMEG ang operasyon.
Napugos kuno ug hatag ang membro sa BFA, matud ni Esquivel, kay gihulga sila ni Gultiano nga dakpon sila ug dili sila mohatag.
Nag atubang karon si Gultiano ug kaso tungod sa paglapas sa Republic Act No. 3019 or the Anti-Graft and Corrupt Practices Act and Republic Act No. 6713 or the Act Establishing a Code of Conduct and Ethical Standards for Public Officials and Employees.
Matud ni Esquivel, dili magpanuko ang iyang buhatan sa pagpalagpot sa mga pulis nga dunay ilegal nga binuhatan maskin pa kuno og unsay ranggo niini.-JAP
