DAVAO CITY — Personal nga gipanghatud ni Davao del Norte Governor Edwin Jubahib ang
mga food packs sa mga mosque sa lain-laing lugar sa probinsiya aron makatabang sa mga
kaigsoonang Muslim nga apektado sa coronavirus disease (Covid-19) pandemic.
Sumalani Jubahib, walay gipili ang iyang adinistrasyon sa paghatag og ayuda tungod kay tanan apektado sa coronavirus pandemic.
“Wala tay gipili, tungod kay kuarta kini sa katawhan, natural lang nga sila ang makabenepisyo,” saysay ni Jubahib.
Bisan pa man nga nag-obserbar ang mga Muslim sa Ramadan, kinahanglan nila ug pagkaon matag adlaw labi na sa mga buntis, mga may edad, may sakit ug mga bata, saysay sa Gobernador.
Gihatdan og pagkaon ug ubang pang ayuda ang 24 ka mosque sa Panabo City niadtong Biyernes, Mayo 8, ug sa 18 ka mosque sa lungsod sa Carmen, Dujali, ug Sto. Tomas pagka sunod adlaw.
Ang kada mosque gihatdan og tagsa ka sakong bugas, duha ka sakong harina, napulo ka kilo nga asukal, ug mga kape.
Ang mga kadagkuan sa mga Muslim community, nga kasamtangang nagsaulog sa ilang
Ramadan, nagpaabot sa ilang dakong pasalamat kang Gov. Jubahib.
“Ako lang ipaabot kang Gob ang pagpasalamat namo sa among purok kay karong panahona hasta gyud kapait. Kay ang kahumok sa iyang kasingkasing miabot gyud
ang hinabang, daghan kaayong salamat Governor Jubahib,” sulti ni Allan Saronay Malawani sa Purok Islam, Gredu, Panabo City.
Sa iyang bahin, si Ricardo Macla, lider sa laing Muslim community, nag-ingon nga bisan ginagmay nga hinabang, dako na kaayo kining tabang alang kanila.
“Dakong pasalamat nako ana kay Gob. Hasta ning akong mga sakop nga katawhan dako kaayong tabang ni. Bisag gamay ra dako na kaayo na’g ikatabang sa katawhan. Kabalo ko nga si Gob di gyud na mobiya sa katawhan, motabang gyud na. Siyempre, dakong
pasalamat, dinagkong pasalamat uban sa among katawhan diri. Salamat kaayo,” ingon ni Macla.
Niadtong Mayo 4, nanghatag usab ang gobernador ug tag-duha ka sakong bugas sa matag parokya sa simbahang Katoliko didto sa ikaduhang distrito sa lalawigan.
Ang pagpanghatod sa mga hinabang ngadto sa mga mosque gipangunahan nila ni Indigenous Peoples Mandatory Representative ug ex-officio Provincial Board Member Ariel Macla ug ni Norlyn Oring, ang executive assistant sa gobernador. (LBG)
