DAKBAYAN SA DAVAO (Nobiemre 3) – Gibalibaran sa International Criminal Court (ICC) ang hangyo sa mga representante sa mga biktima nga mogamit og Tagalog sa pipila ka bahin sa ilang pasiunang pahayag (opening statement) sa husay batok kang kanhi Presidente Rodrigo Duterte.
Matud ni ICC Presiding Judge Joanna Korner, base sa Statue of Rome, English lang ug Prances lang ang pinulungan ang puedeng gamiton sulod sa korte, ug gikinahanglan ang espesyal kaayo nga mga rason aron tugotan ang paggamit sa laing pinulongan.
Ang pagpaklaro gipagawas human mihangyo si Paolina Massidda, ang abogado sa mga biktima, nga tugotan ang limitado nga paggamit sa Tagalog sa pagkuha sa mga testimony sa mga biktima atol sa pasiunang pahayag, sa pagsugod sa husay batok kang Duterte karong Nobyembre 30.
Matod ni Massidda, iyang gihangyo sa korte aron matabangan ang mga Pilipinong biktima nga makasaysay sa ilang kasinatian kasinatian nga gipresentar atubangan sa mga maghuhukom.
Gipasabot niya sa korte nga ang paggamit sa Tagalog limitado lamang sa mga 15 ngadto sa 20 ka minuto sa kinatibuk-ang presentasyon, diin ang matag kutlo molungtad lamang og usa o duha ka minuto.
Apan, matud ni Koroner nga dili tanang biktima nakasulti og Tagalog, sanglit ang uban kanila naggamit og ubang mga pinulongan sa Pilipinas.
Miingon si Korner nga siguroon sa korte nga adunay tighubad (interpreter) sa mga proseso, ug ilang konsiderahon kung mahimo bang i-post ang mga hubad o transcript sa Tagalog sa website sa ICC.
Tungod niini nga desisyon, kinahanglang ipadayag sa mga representante sa mga biktima ang ilang pasiunang pahayag sa pinulongang Ingles, bisan pa man nga adunay itagana nga paghubad atol sa husay.
Gilauman nga ang prosekusyon ang unang mopadayag sa ilang pasiunang pahayag, nga sundan sa mga representante sa mga biktima. Ang prosekusyon nagpahibalo nga naningkamot sila nga limitahan ang ilang presentasyon ngadto sa mga tulo ka oras o ubos pa, samtang ang grupo sa mga biktima nagrepaso usab sa oras nga gigahin alang sa ilang pahayag.
Ang kanhi presidente nag-atubang og tulo ka ihap sa mga krimen batok sa katawhan (crimes against humanity), nga naglakip sa pagpatay ug pagsulay sa pagpatay, may kalabotan sa mga pagpatay nga giingong nahitabo sa panahon nga siya nagserbisyo isip mayor sa Davao City ug isip presidente.
Ang mga kaso naglakip sa giingong mga pagpatay sa Davao City tali sa 2013 ug Hunyo 2016, mga pagpatay sa gitawag nga “high-value targets” sa tibuok nasud gikan sa Hulyo 2016 hangtod Hulyo 2017, ug mga pagpatay atol sa mga operasyon sa paglimpyo sa mga barangay gikan sa Hulyo 2016 hangtod Septyembre 2018.
Una pa man niini, gihimakak sa kampo ni Duterte ang mga kaso, apan, niadtong Marso 13, 2025, gidala si Duterte didto sa ICC bisan oa man gikuestyon sa iyang mga bogado ang proseso.-ezc
