DAKBAYAN SA OZAMIZ,MINDANAO-–Gibana-banang mokabat sa P24 Milyones ang kantidad sa shabu, klase-klaseng armas, mga bala ug eksplosibo ang nasakmit sa PNP sa gihimong pagpangronda  sa lima ka balay sa Purok 1, barangay Bagakay, Ozamiz City, niadtong Sabado, Hunyo 23.
Gamit ang search warrant nga gipakanaug ni Judge Rio Achas, gironda nila Police chief inspector Jovie Espenido ug iyang mga sakop, ang panimalay sa negosyanteng si Franciso “Boy” Luansing.
Gi-aresto ang mag -tiayong Boy Luansing, iyang asawang si Patricia ug ilang mga anak nga si Diego, 38 ug Rosaida Claire, 33 nagpuyo sa nasangpit nga dapit.
Apan, adunay mga residente nga nagduda sa gihimo ni Espenido, tungod kay walay laing mi-uban sa maong pag-pangronda, gani walay representante ang barangay o sakop sa media.
Si Boy Luansing ang nagdumala sa negosyo sa pamilya Luansing, ug ang kuarta kuno nga balor P300,000.00 nga gisakmit sa kapulisan, tibouk semanang halin sa mga tindahan ug kita sa swimming pool.
Sa kinatibuk-an maobot sa tulo ka kilo nga shabu ang nakuha sa PNP nga adunay street value nga P24 M.
Ang mga armas ug bala nga nakuha naglakip sa Thomson sub machine gun, shot gun 12 gauge, 3 magazine m16 rifle, 1 mags 380 pistol, 2 mags of Barrett, 2 pieces live ammo shotgun, 5 ammo 9mm, 10 ammo of 45, 15 ammo of 5.56 AP-13, 19 ammo, assorted nga mga bahin sa armas ug mga eksplosibo.
Si Boy Launsing, igsoon ni Ozamiz City acting Mayor Irene Girlet Launsing. Sa pagkakaron wala pay opisyal nga pahayag nga gipagawas ang pamilyang Launsing.
Matud pa sa pipila ka kaila sa pamilya Luansing, adunay away sulod mismo sa pamilya Luansing, kay nagduda ang mga igsoon sa Mayor nga iyang gi-unay ug padakop ang membro sa iyang banay, nga adunay kalambigitan sa mga Parojinog.
Si Boy Luansing mao usab ang amahan ni Board member Mena ‘Meme’ Launsing nga live in partner ni Councilor Ricardo ‘Ardot’ Parojinog.
Nagsunod ang pagkasikop kang Mena ug Parojinog niadtong imaging bulan. Si Parojinog nasikop sa Taiwan samtang si Launsing nasikop sa Paranque.-NEPTALIE BATOLENIO/NewsLine.ph
