DAKBAYAN SA DAVAO –— Tungod sa ka epektibo sa pamaagi sa pagtabang sa probinsyal nga panggamhanan sa Davao del Norte sa iyang katawhan, mikunhod ang ihap sa mga kabus, kini sumala sa Philippine Statistics Authority (PSA).
Sa report sa PSA niadtong tuig 2021 nga bag-ohay palang gipagawas sa publiko, nahibaw-an nga ang Davao del Norte ang dunay pinakaubos nga ihap sa katawhan nga kabus ang kahimtang sa kinabuhi sa mga probinsiya sa Davao Region.
Ang magkunhod sa ihap sa mga kabus gilantaw nga positibong epekto sa pagpadagan ug pagpanerbisyo ni Gobernador Edwin “Kuya Gov” Jubahib, ug tungod usab sa mga polisiya ug mga reporma, programa ug proyekto nga iyang gipatuman taliwala sa hagit sa pandemya.
“Nalipay kaayo ko nga nahimong effective ang atong pagpaningkamot sa paghatud og serbisyo sa katawhan,” saysay ni gobernador Jubahib.
Ang gidaghanon sa ihap sa mga pamilyang nagpuyo sa kawad-on sa probinsiya mikunhod gikan 12.5 percent sa tuig 2018 ngadto sa 7.3 percent sa tuig 2021. Mas ubos pa kini sa kaysa sa tala sa Davao Region nga 11.9 percent.
Ang poverty incidence mao ang kadaghanon sa ihap sa katawhan kung diin ang ilang kita kulang pa sa ilang batakang panginahanglanon o nag-ilaid. kay ang ilang kita dili kasapar sa ilang gikinahanglan aron makakaon og katulo sa usa ka adlaw.
Ug dili matubag sa ilang kita ang mga panginahanglanon sama sa pagkaon ug uban pang panginahanglan sama sa pamiste, pabalay, plete, panglawas ug edukasyon.
Tungod sa maayong pagpadagan sa probinsiya, giapil na ang Davao del Norte sa Cluster 5, kon “least poor cluster” o dunay pinakaubos nga ihap sa mga kabus.
Lakip sa daghang kabag-ohan nga gihimo ni Kuya Gov ang DavNor KAAGAPAY program nga naghatag kasigurohan sa pagkaon kon food security, panginabuhian ug nagprotektar sa kinaiyahan; pag-abli sa kapin dosenang kadalanan, mga eskwelahan, health center ug labaw sa 600 ka pabalay nga nagpausab sa kahimtang sa mga tribo; Zero-Billing program ug uban pa nga nagpalambo sa kalidad sa panlawas sa mga kabus; Oplan Canal Bayanihan program nga mipakunhod sa insidente sa grabeng pagbaha sa lalawigan; ug ang programang pangkalinaw ug pangkalamboan nga mipukan sa problema sa insuhensiya probinsiya, hinungdan nga gideklara sa Armed Forces of the Philippines nga ”Insurgency-Free Province” ang Davao del Norte.
Ilawom sa pagdumala ni Kuya Gov, napalig-on ang pagpanguna sa probinsiya isip pinakaprogresibo nga lalawigan sa Mindanao. Apil sa nakuha niini nga mga award ang 2022 Seal of Good Local Governance (SGLG); “Beyond Compliant” Award sa 22nd Gawad Kalasag Seal for Excellence in Disaster Risk Reduction and Management; 3rd Most Competitive Province in the Philippines Award ug Most Competitive Province in VisMin Region sa tuig 2022; 2021 Governor of the Year Award; 2021 Most Liveable and Sustainable Province Award; 2021 Best in Government Covid-19 Pandemic Response Award; 2019 SGLG; 2019 Most Business-Friendly (MBF) Province in the Philippines; ug Overall 2nd Most Competitive Province in the Philippines sa tuig 2020 ug 2021.
“Ang pagkunhod sa ihap sa kabus sa probinsya among nakab-ot tungod kay naghiusa kami sa pag atubang sa mga problema ug dungan namong gip-asdang ang mga programa ug gisuportahan namu ang matag usa mao kini ang among kadaugan bunga sa among pagtinabangay ug dungan nga gipaningkamutan nga makab-ot ang malungtarong kalamboan.”-Eugene Hinutan
