DAKBAYAN SA DABAW--Gibalhog na karon sa selda sa Bureau of Immigration ang usa ka Insik nga nangluwa sa usa ka pulis human kini nadakpan nga misupak sa balaud trapiko.
Sumala ni Dana Sandoval ang tigpamaba sa Immigration, pasakahan ug kaso ang 50-anyos nga si Zhou Zhiyi, human kini madakpi sa mga operatiba sa BI ug sa Manila Police District didto sa UN Avenue sa Manila, human mibayad sa iyang piansa niadtong Lunes.
“Wala pa ma iskedyul ang iyang pagpauli sa Insik, kinahanglan nga ma resolba usa ang iyang kaso sa korte, dayon kini papaulion sa iyang nasud,” saysay ni Sandoval kagahapon, Mierkules, Pebrero 19.
Gibalhog karon si Zhou sa selda sa BI didto sa Bicutan, Taguig City.
Gimando ni Immigration Commissioner Jaime Morente ang pag-aresto kang Zhou human niini nahibaw-an nga naka piansa ang Insik.
“ Gi-aresto siya pagkahuman niya ng piansa, puede man siya mo-piansa sa kaso niya nga gi-atubang sa BI, apan, tagsa ra motugot ang akong buhatan nga makapiansa ang among mga dinakpan,” dugang ni Morente.
Pasakahan usab og kaso si Zhou tungod kay dugay na kini sa Pilipinas ug wala siyay mga papeles.
Si Zhou nakalapas sa number coding, og sa dihang gipara kini, wala siya mihunong ug gipagukod pa niya ang kapulisan.
Sa gihang nadakpan kini, imbis nga modawat sa tiket sa iyang paglapas, iyang giluwaan ang pulis.
Girekisa ang lawas ni Zhou, og nakitaan kini og usa ka gamayng selopin nga gituohang ilegal nga druga kon ‘Shabu’.
Miabot si Zhou sa Pilipinas niadtong Nobiembre 11, 2019, gitagaan siya og 30 ka adlaw nga permiso nga makapuyo sa Pilipina. Apan, milapas na kini sa iyang tagal ug gikonsidera nga illegal na ang iyang pagpuyo sa nasud.-Jiann Padillo/
