POLOMOLOK, South Cotabato —PATAY ang kanhi presidente sa Liga ng Barangay ug kasamtangang kagawad sa munisipyo nga apil sa ‘narco list’ sa kapuisan, human kini gipusil sa riding in tandem mga 1:00 ang tagna sa hapon niadtong Huebes, Nobiembre 14.
Giila ni P/Col.Lino Capillan, tigpamaba sa Police Regional Office 12, ang biktima nga si Vicente Castro Yungco Jr., 48 anyos, minyo, kasamtangang barangay kagawad, ug molupyo sa Purok Malinawan, Barangay Poblacion.
Matud ni Capillan, nagmaneho si Yungco ang iyang Isuzu crosswind nga may plakang KDA 411, kuyog ang iyang anak, ug usa ka pag-umangkon, apan pag-abot sa dalang Dahlia St., sa maong Barangay kalit lamang may mibuthong duha ka indibidwal sakay sa XRM nga motorsiklo kolor itum, walay plaka ug gipusil ang kagawad nga miigo sa iyang dughan ug ang usa ka bala sa walang bahin sa bukton niini.
Gidala gilayon si Yungco sa hospital apan gi-deklara kining dead-on-arrival.
Nakakuha ang mga personahe sa Scene of the Crime Operative (SOCO) og usa ka fired cartridge ug duha ka deformed slug gikan sa .45 kalibreng pistola.
Naapil ang pangalan ni Yungco sa ‘narco list’ sa PNP-12, isip protektor sa illegal nga druga. Gi-aresto siya sa kapulisan niadtong Oktobre 13, 2016 sa usa ka anti-illegal drugs operation.
Wala pay opisyal nga pahayag ang pamilya sa kagawad.-Randy Patches
