DAKBAYAN SA DABAW (Agosto 6) — Padayon ang imbistigasyon sa kapulisan sa Buhangin aron mailhan ug madakpan ang mibasnig kang Arnold Mascariñas Maalat, kanhi kapitan sa barangay Communal ning lungsod.
Si Maalat gipusil sa duha ka wala mailhing suspetsado samtang nagtabok sa karsada gikan sa sabungan niadtong Sabado, Agosto 3 didto sa G. P. Garcia highway sa Buhangin.
Sumala ni Kapitan Maria Theresita Gaspan, tigpamaba sa Davao City Police Office (DCPO), napriso si Maalat niadtong Septiembre 2017 sa paglapas sa Dangerous Drugs Act of 2002, ug bag-o lang kining nakagawas human sa usa ka kasulatan nga iyang gisang-at sa korte.
Sa inisyal nga imbistigasyon sa kapulisan, nagbaktas si Maalat ug iyang kauban nga si Juleto Cayonda gikan sa sabungan sa dihang kalit may miduol nga duha katawo ug gipusil ang biktima.
Mikagiw gilayon ang mga suspetsado sakay sa puti nga Honda XRM 125 paingon sa diversion road.
Daling miabot ang Medical 33 sa Central 911, ug ilang nakita nga adunay tulo ka igo sa bala sa likod sa biktima ug ang usa pa ka bala miigo sa iyang ulo hinungdan sa iyang hinanaling kamatayon.
Ang Scene of the Crime Operatives (Soco) nakakuha ug tulo ka basiyo sa bala sa .45 pusil. –NewsLine.ph
